Ég hef aldrei komið til Parísar. En mig hefur alltaf langað að dreypa á frönskum Latté á útikaffihúsi, gefa dúfunum að borða. Næla mér í ferskt snittubrauð í bakaríinu á horninu og setjast upp í hringekju.
Stelast til að kaupa ósvikið Candy Floss, flissa í suður-evrópskum strætó og kannski fara upp í Effeilturninn. Líklegri væri ég til að kasta klinki í hatt götulistamanns, finna mér lúinn bakgarð og dæsa af unaði.
Einn sá skemmtilegasti eiginleiki sem ég veit á Instagram er # merkið alræmda. Sem færði mér heiminn að dyrum í dag, sýndi mér veröldina með augum þeirra sem heimsótt hafa París frá því vorið skall á og deila því fúslega með gangandi og gestum á opnum Instagram reikningum.
“Gone are the days” – segi ég, þegar ég fór og festi auðmjúk kaup á ferðahandbókum, lagði útlenska frasa á minnið og staulaðist að galtómum sparibauknum meðan ég barði höfðinu við vegg og bar upp spurninguna: “Hvenær lít ég París augum?”
Í meðfylgjandi albúmi má sjá #springinparis á Instagram
Hún er á Instagram: Smelltu á hnappinn
Klara Egilson er íslenskur blaðamaður búsettur í Osló. Hún hefur gengt ritstörfum frá unga aldri og gaf út sína fyrstu smásögu sex ára að aldri: “Kartaflan sem fann alltaf vitlausa lykt” en hefur skrifað allar götur síðan og er ekki ókunn íslenskum fjölmiðlum. Hún er elsk á orð, fagra muni og umfram allt; fjölbreytileika mannlífsins. Klara gegnir í dag stöðu aðstoðarritstjóra HÚN.IS og tekur á ýmsu í umfjöllunum sínum.
