Í seinustu viku fór ég á konfektnámskeið.
Námskeiðið var haldið í höfuðstöðvum Nóa Síríus og ég mætti galvösk til að læra um leyndardóma konfektgerðarinnar. Ég man ekki eftir því að hafa búið til konfekt nema einu sinni á ævinni og þá rúllaði maður marsipani í kúlur og dýfði í suðusúkkulaði. Það var reyndar mjög gott, svona þegar ég leiði hugann að því.
Nú, við mættum nokkuð margar, bara konur. Kennarinn var hinsvegar karlmaður sem heitir Axel Þorsteinsson en hann starfar á Apotek Restaurant. Hann sagði okkur frá því hvernig best er að hita og bræða súkkulaði, kenndi okkur réttu handtökin og einnig réttu blöndurnar.
Þvílík og önnur eins veisla! Það var hver molinn girnilegri og mig langaði, mest af öllu að sleppa fram af mér beislinu og borða ALLT sem var þarna. Ef ég hefði verið skilin eftir þarna ein í smá stund, þá hefði ekki verið hægt að halda þetta námskeið, það hefði ekkert verið eftir. Namm namm namm!
En auðvitað, hélt ég mig á mottunni, eins og við dömurnar gerum. Fylgdist með í ró og spekt og dáðist að hugmyndafluginu sem þarf til að setja molana og hversu einfalt þetta er í raun þegar maður hefur smá grunn. Ég sé til dæmis alveg fyrir mér að gera svona góðgæti fyrir jólin og gefa nokkrum útvöldum í jólagjöf. Auðvitað myndi ég gera smá fyrir mig líka og fjölskylduna en úlfahjörðin heima hjá mér „andaði“ molunum að sér á ljóshraða þegar ég gaf þeim lausan tauminn.
Hér eru nokkrar myndir frá þessu kvöldi:
Kidda Svarfdal er ritstjóri og eigandi Hún.is en hún er frá Djúpavík á Ströndum. Hún fór á bát og snjósleða í skólann þegar hún var lítil og var í heimavist í Finnbogastaðaskóla. Hún hefur haft gaman að krossgátum og íslensku frá unga aldri og hefur skrifað ljóð, sögur, pistla og fleira. Ásamt því að skrifa á Hún.is er Kidda, ásamt fjölskyldu sinni, mikið í Djúpavík þar sem fjölskyldan er með ferðaþjónustu.
