Vikumatseðill: 2. júní til 9. júní – Fiski-tacos Gwyneth Paltrow

Þessa vikuna skyggnumst við í uppskriftir hjá Dröfn Vilhjálmsdóttur sem heldur úti dásamlegu matarbloggi sem nefnist Eldhússögur úr Kleifarselinu.   Það er úr miklu að taka og fannst mér „Fiski-tacos Gwyneth Paltrow“ hrikalega girnilegt.  Hlakka til að elda Roastbeef með alvöru Bearnaise sósu.  En að taka til matseðill fyrir vikuna léttir manni lífið og þarf ekki að standa í búðinni rétt fyrir kvöldmat og klóra sér í hausnum yfir hvað á að vera í matinn í kvöld.

Mánudagur

img_4703

Fiskisúpa að vestan

Uppskrift (fyrir 6-8):

  • 500 gr langa, skorin í bita
  • 500 gr þorskur, skorin í bita
  • 300 gr rækjur
  • 3 hvítlauksrif, söxuð
  • 3-4 gulrætur, sneiddar
  • 1 stk. laukur, saxaður meðalstóra bita
  • 1 rauð paprika, skorin í meðalstóra bita
  • 1 gul eða appelsínugul paprika, skorin í meðalstóra bita
  • 2-3 msk tómatpúrra
  • 1 dós niðursoðnir tómatar
  • 3 dl vatn
  • 1 teningur fiskikraftur
  • ½ teningur hænsnakraftur
  • 1 tsk. tandoori masala
  • ½ tsk. karrí
  • ¼ tsk. hvítur pipar
  • 6 sólþurrkaðir tómatar, sneiddir
  • 4 msk. mango chutney
  • 1 dl sæt chilisósa
  • 2 fernur matreiðslurjómi (hægt að skipta út að hluta eða öllu leyti fyrir kókosmjólk)

Aðferð: 

Image

Ein matskeið olíu hituð í potti og hvítlaukurinn steiktur í skamma stund. Áður en hann byrjar að brenna er hann tekinn upp úr og settur til hliðar. Tveimur matskeiðum af olíu bætt við í sama pott og gulrætur, laukur og paprika brúnuð. Því næst er tómatpúrru, niðursoðnu tómötum, vatni, fiskikrafti, hænsnakrafti, tandoori masala, karríi og hvítum pipar ásamt hvítlauknum bætt út í. Strax á eftir eru sólþurrkuðu tómatarnir sneiddir niður og þeim ásamt mango chutney, sætu chilisósunni og matreiðslurjómanum bætt við. Möluðum svörtum pipar bætt við eftir smekk og látið sjóða niður í um það bil fimmtán mínútur. Þá er slökkt undir pottinum. Þegar borðhaldið fer að nálgast er vermt undir pottinum og þorskinum og löngunni bætt út í.  Látið standa í fimm mínútur. Rétt áður en súpan er borin fram er rækjum bætt út í. Skreytt með smátt skorinni steinselju. Súpan er borin fram með góðu brauði.

 

Þriðjudagur

img_9293

Salat með sesamkjúklingi

Uppskrift:

  • kjúklingabringur
  • salt & pipar
  • kjúklingakrydd
  • olía og/eða smjör til steikingar
  • maple síróp
  • sesamfræ
  • spínat
  • klettasalat
  • grænt salat
  • kokteiltómatar, skornir til helminga
  • avókadó, skorið í bita
  • mangó, skorið í bita
  • jarðaber, skorin í bita
  • nachos flögur, muldar gróft
  • beikon
  • fetaostur með olíu en olían síuð frá

Kjúklingabringur eru skornar í fremur litla bita og þeir kryddaðir með salti, pipar og góðu kjúklingakryddi. Steikt á pönnu þar til kjúklingabitarnir hafa náð góðum lit. Þá er sírópi og sesamfræum bætt út á pönnuna, hrært vel saman við kjúklinginn, og látið krauma í dálitla stund (þar til enginn vökvi er eftir á pönnunni). Ég notaði 1 kíló af kjúklingabringum og ca. 1/2 dl af maple sírópi og 1/3 dl af sesamfræum. Þegar kjúklingurinn er tilbúinn er hann látin til hliðar og leyft að kólna.

Beikon er skorið í litla bita og steikt á pönnu þar til bitarnir verða stökkir. Þá er öllum hráefnunum blandað saman og salatdressingunni dreift yfir salatið.

img_9291

Salatdressing:

  • 1/2 dl olífuolía
  • 2 hvítlauksrif, pressuð
  • 1-2 cm ferskur engifer, rifinn fínt
  • nokkrar greinar fersk steinselja, söxuð fínt
  • ca 1 msk sesamfræ
  • maldon salt
  • 1/2 tsk grænmetiskraftur eða 1/2 teningur grænmetiskraftur

Öllum hráefnunum blandað vel saman og dressingunni dreift yfir salatið.

 

 

Miðvikudagur

img_7711

Fiski-tacos Gwyneth Paltrow

Uppskrift fyrir 6:

  • Djúpsteiktur fiskur
  • Límónu krem (lime creme)
  • Tómatsalsa (Pico de gallo)
  • Guacamole
  • “smokey” sósa (Chipotle)
  • salatblöð
  • Korn-tortillur eða hveiti-tortillur
  • gott að bera fram með þessu límónubáta (lime) til að kreista yfir allt

Tómatsalsa (Pico de gallo):

img_7684

  • 4-6 tómatar, saxaðir fremur smátt
  • ½ rauðlaukur (lítill), saxaður mjög smátt
  • 2 msk fínsaxaður kóríander
  • Maldon salt
  • Safi úr einni límónu (lime)

Öllu blandað saman í skál.

 

Guacamole:

  • 1-2 þroskuð avacado
  • 2 msk hvítur laukur, smátt saxaður
  • 3 msk kóríander, smátt saxað
  • Safi úr einni límónu (lime)
  • maldon salt

Öllu blandað saman í skál.

“Chipotle mayo” (smokey sósa)

  • 100 ml majónes (eða sýrður rjómi)
  • 2 chipotle í adobo sósu
  • 1 hvítlauksrif
  • salt

Maukað saman í matvinnsluvél eða með töfrasprota. Ég fann sem sagt ekki chipotle í adobo sósu og keypti chipotle salsa í Kosti. Við notuðum það beint upp úr krukkunni en ég blandaði það með sýrðum rjóma fyrir krakkana. Til þess að ná reykta bragðinu er líka hægt að nota bara venjulega barbeque sósu og blanda við majones/sýrðan rjóma – þá þarf ekki einu sinni að fara í Kost!

Límónukrem (lime creme)

  • 150 ml majones (eða sýrður rjómi)
  • 1.5 msk límónu safi (lime)
  • salt

Djúpsteiktur fiskur

  • Körfublómaolía eða hnetuolía fyrir djúpsteikingu (ég notaði corn oil frá Wesson úr Kosti)
  •  250 ml hveiti
  • 250 ml bjór
  • maldon salt
  • svartur pipar
  • 700 gr þorskur (eða ýsa), skorinn í fingurlanga strimla.

Olía sett í djúpsteikingarpott eða í stóran pott, ca 5 cm (ég notaði reyndar meira) og hitað upp í 180 gráður. Það er líka hægt að prófa sig áfram með því að setja lítinn brauðbita ofan í olíuna. Ef hann verður gullinbrúnn fljótt er olían tilbúin. Á meðan olían hitnar er hveiti, bjór, dálítið af salti og pipar, pískað saman í stórri skál. Fiskinum dýpt ofan í deigið (ég notaði eldhústöng) og svo djúpsteiktur. Steiktur í 3-4 mínútur og honum snúið við á meðan. Steikt þangað til hann er orðinn fallega gylltur. Það þarf að passa að setja ekki of mikið í pottinn í einu! Fiskurinn er svo settur á grind með eldhúspappír undir og salti stráð yfir hann. Haldið áfram þar til allur fiskurinn er steiktur. Olían er látin kólna í pottinum, hún er svo sigtuð og sett aftur ofan í brúsann, hana er hægt að nota aftur.

 

Fimmtudagur

img_7959

Baka með sætum kartöflum

Uppskrift:

  • 2-3 sætar kartöflur
  • 1 pakki smjördeig, afþýtt
  • 200 gr sýrður rjómi
  • 1 egg
  • 1 eggjarauða
  • 1/2 tsk salt
  • 1 krukka fetaostur
  • 2-3 msk salatblanda (hnetu- og fræblanda)
  • nýmalaður pipar
  • 4 msk parmesanostur, rifinn
  • 2 msk olía

 

Hitið ofninn í 200 gráður. Pakkið sætu kartöflunum í álpappír og bakið þær í 40 mínútur eða þar til þær eru næstum bakaðar í gegn. Þar sem ég er óþolinmóð og alltaf í tímaþröng þá skar ég hverja kartöflu í ca. þrjá bita og bakaði þær þannig, þá gat ég stytt bökunartímann. Ef þið notið Findus smjördeig, 5 plötur, þá eru þær afþýddar, lagðar á hveitstráð borð og samskeytin lögð ofan á hvert annað. Deigið er svo flatt út dálítið þannig að það passi í eldfast mót. Fóðrið botn og hliðar á eldfasta mótinu (20×30 cm) með smjördeiginu, látið 3 cm deigkant vera allan hringinn. Blandið sýrðum rjóma, eggi, eggjarauðu og salti saman. Smyrjið blönduna yfir deigið. Afhýðið kartöflurnar, skerið í bita og setjið ofan á blönduna. Sigtið olíuna frá fetaostinum og dreifið honum yfir kartöflurnar. Sáldrið salatblöndu, nýmöldum pipar og parmesanosti ofan á. Penslið deigkantana með olíu. Bakið í um það bil 25 mínútur eða þar til deigið er orðið gullið. Berið fram með góðu salati.

 

 

Föstudagur

img_5821

Mexíkósk tortilluterta

Uppskrift f. 4:

  • 5-6 st meðalstórar tortillakökur
  • 800 gr. kjúklingabringur
  • 1/2-1 bréf burrito kjúklingakrydd
  • 1 gulur laukur
  • 1 púrrlaukur
  • 250 gr. sveppir
  • 1 rauð paprika
  • smjör til steikingar
  • 1 krukka Thick´n Chunky Salsa
  • 200 rjómaostur
  • svartar ólífur, saxaðar
  • rifinn ostur
  • salt og pipar

Stillið ofninn á 225 gráður. Skerið kjúklingabringurnar í litla teninga, saxið laukinn, skerið púrrlaukinn í strimla, sneiðið sveppina og skerið paprikuna í bita. Steikið kjúklinginn í smjörinu og kryddið með burrito kryddinu, bætið sveppum, papriku, lauk og púrrlauk við og steikið í nokkrar mínútur. Bætið út í salsaósunni og rjómaosti og látið malla þar til að rjómaosturinn hefur bráðnað. Smakkið til með salti og pipar.

Setjið smjörpappír á ofnplötu og eina tortillaköku á plötuna. Breiðið kjúklingasósu yfir kökuna, þá rifnum osti, leggið yfir aðra tortilluköku yfir og þannig koll af kolli. Endið á kjúklingasósu, stráið ólífum yfir og að lokum rifnum osti.  Hitið í ofninum í ca. 15 mínútur eða þar til osturinn er bráðnaður og gullinbrúnn.

Berið fram með salati, sýrðum rjóma, fersku guacamole og salsasósu.

 

 

Laugardagur

img_84531

Cajunkjúklingur með tagliatelle

Uppskrift:

  • 500 g tagliatelle pasta
  • 500 g kjúklingabringur
  • 2 tsk cajun krydd
  • 1 msk olía
  • 1 rauð paprika, skorin í þunna strimla
  • 1 gul paprika, skorin í þunna strimla
  • 1/2 rauður chili, fræhreinsaður og saxaður smátt
  • 250 g sveppir, skornir í þunnar sneiðar
  • 1/2 rauðlaukur, skorin í þunna strimla
  • 3 hvítlauksrif, söxuð smátt
  • 2 stórir tómatar, skornir í teninga
  • 240 g kjúklingasoð (sjóðandi vatn + kjúklingakraftur)
  • 80 g mjólk
  • 1 msk hveiti
  • 3 msk rjómaostur
  • grófmalaður svartur pipar og salt

Grænmetið skorið samkvæmt leiðbeiningum. Mjólk, hveiti og rjómaosti er blandað saman í matvinnsluvél eða með töfrasprota. Kjúklingurinn er skorin í strimla og kryddaður vel með cajun-kryddinu og salti.
Pasta er soðið samkvæmt leiðbeiningum. Á meðan er olía sett á pönnu og kjúklingur steiktur á pönnunni. Þegar kjúklingurinn er steiktur í gegn er hann veiddur af pönnunni og látin bíða. Þá er bætt við dálítilli olíu á pönnuna og paprika, laukur, chili og hvítlaukur steikt í nokkrar mínútur. Því næst er sveppum og tómötum bætt út í og steikt í nokkrar mínútur í viðbót. Kryddað með salti og pipar. Að lokum er kjúklingasoðinu ásamt mjólkurblöndunni bætt út á pönnuna og látið malla á vægum hita í 2-3 mínútur. Þá er kjúklingurinn settur aftur á pönnuna. Öllu er svo blandað vel saman við sjóðandi heitt pasta. Ég bar fram réttinn með fersku kóríander og rifnum parmesan osti. Njótið!

img_8457-1

 

 

Sunnudagur

img_91371

Roastbeef með bearnaise sósu, kartöflugratíni og spínatsalati með jarðaberjum

Uppskrift:

  • ca 2 kíló nauta innra læri
  • olía
  • smjör og olía til steikingar
  • maldonsalt
  • ferskmalaður svartur pipar

Kjötið er tekið úr kæli og látið ná stofuhita. Ofninn er hitaður í 120 gráður, undir- og yfirhita. Þá er það nuddað með olíu og kryddað mjög vel með maldonsalti og ferskmöluðum svörtum pipar. Kjötið er steikt á pönnu upp úr blöndu af smjöri og olíu við háan hita á öllum hliðum í stutta stund. Þá er kjötið lagt í eldfast mót og kjöthitamæli stungið í þykkasta hluta kjötsins. Kjötið er steikt í ofni við 120 gráður þar til kjarnhiti kjötsins hefur náð um það bil 55 gráðum. Kjötið hjá mér var 2 kíló og það tók 2 klukkutíma á 120 gráðum að ná þessum kjarnhita. Þá er kjötið tekið út og látið jafna sig í 15-20 mínútur undir álpappír. Mjög mikilvægt er að leyfa kjötinu að jafna sig eftir ofnsteikinguna, ef það er skorið of snemma þá missir það safann.

Bernaise sósa:

  • 4 eggjarauður
  • 250 gr. smjör
  • 1 msk.  Bernaise Essence
  • Fáfnisgras (franskt estragon –kryddjurt), söxuð smátt
  • salt og pipar

Eggjarauðurnar eru þeyttar ásamt Bernaise essence. Sumir þeyta þær yfir heitu vatnsbaði. Smjör brætt, þegar hitastigið er þannig að maður rétt nær að dýfa fingrinum í það er því hellt varlega í mjórri bunu út í eggjarauðurnar og þeytt í stöðugt á meðan (mikilvægt! – helst að fá einhvern annan til að hella) með písk. Að lokum er estragoni bætt við. Sósan smökkuð til og krydduð með smá salti og pipar ef þarf. Það má ekki hita upp sósuna aftur eftir að eggjarauðum og smjöri hefur verið blandað saman, þá skilur hún sig. Bearnaise sósan er því ekki heit þegar hún er borin fram, bara volg og má jafnvel vera köld. En fyrir þá sem vilja heita sósu er hægt að hita hana upp varlega yfir vatnsbaði.

Spínatsalat með jarðaberjum:

  • spínat
  • jarðaber, skorin í bita
  • fetaostur í olíu
  • ristaðar valhnetur

Spínatið er lagt á disk. Jarðaberjunum er svo dreift ofan á spínatið ásamt fetaostinum (smá olía með). Því næst eru valhneturnar saxaðar gróft og þær þurrristaðar á pönnu á eftirfarandi hátt. Panna hituð og valhneturnar ristaðar á pönnunni við fremur háan hita í nokkrar mínútur þar til þær hafa náð góðri ristun, hrært í þeim stöðugt á meðan til þess að þær brenni ekki. Þegar hneturnar hafa kólnað dálítið er þeim að lokum dreift yfir salatið.

Kartöflugratín f. 8-10

  • ca 1,5 kíló kartöflur
  • 4 dl rjómi
  • 4 dl mjólk
  • hálfur rauðlaukur, skorin í strimla
  • 3 hvítlauksrif, söxuð smátt
  • 1 grænmetisteningur
  • Töfrakrydd, salt og pipar
  • rifinn ostur

Kartöflurnar skolaðar vel (ég hef þær oftast með hýðinu á) og svo skornar í skífur, sumir vilja hafa þær næfurþunnar, mér finnst best að hafa þær ca 1 cm á þykkt. Hvítlaukur og laukur skorinn niður. Mjólk og rjómi hellt í stóran pott ásamt hvítlauk, lauk, grænmetisteningi og kryddi. Ég nota Töfrakrydd frá pottagöldrum, það er góð kryddjurtablanda með cheddar osti sem hentar vel en það er hægt að nota hvaða krydd sem hugurinn girnist. Sjóðið við vægan hita í 10-15 mínútur (fer svolítið eftir þykkt kartaflanna), eða þar til þær eru orðnar vel mjúkar. Hellið þá kartöflublöndunni í eldfast mót, dreifið rifnum osti yfir og hitið í ofni við 200 gráður ca. 20 mínútur eða þar til osturinn er bráðnaður og orðin gullinbrúnn.

 

 

IMG_9156

 

 Eftirréttur

img_47821

Bakaðar perur með mjúkum marengs og súkkulaði

Uppskrift:

  • 1 stór dós perur
  • 4 eggjahvítur
  • 4 msk flórsykur
  • 100 gr suðusúkkulaði
  • 50 gr hvítt súkkulaði (hentar vel að nota hvíta súkkulaðidropa), má sleppa

Aðferð:

Raðið perunum í eldfast mót með skornu hliðina upp. Saxið hvíta súkkulaðið frekar fínt og setjið í dældirnar í perunum, ef notaðir eru hvítir súkkulaðidropar þarf ekki að saxa þá. Stífþeytið eggjahvítur og sykur. Þekjið perurnar með eggjahrærunni. Bakið við 110 gráður í u.þ.b 20 mínútur eða þar til rétturinn er orðinn fallega brúnn. Bræðið súkkulaði í vatnsbaði og dreifið því yfir réttinn eftir að formið er tekið úr ofninum . Berið fram heitt með ís.


 

 Eld

 

Skyldar greinar
Heimagert ravioli með spínati og ricotta fyllingu
Grænmetissúpa
Kjúklingasamloka með mozzarella og aioli majónesi
Fiskur í tómat og feta
Beikonvafðar fylltar kjúklingabringur
Kjúklingur með dijon parmesan hjúp
Súper einfaldur kjúklingaréttur
Ljúffengir leggir
Fiskibollur
Thailenskur kjúklingur í hnetusósu (Satay)
Hoi Sin kjúklingur
Brulée bláberja ostakaka
Einfaldur grænmetisréttur í ofni
Lambalæri með einfaldri hvítlaukssósu
Grillaðar kjúklingabringur með apríkósugljáa
Ravioli með skinku, ostasósu og klettasalati