Hann er 109 ára gamall, prjónar eins og fagmaður og heitir Alfred Date. Býr á áströlsku hjúkrunarheimili og er elsti maður álfunnar. Sem væri ekki í frásögur færandi í sjálfu sér, ef Alfred gamli hefði ekki þá daglegu iðju að bjarga mörgæsum frá bráðum bana – með prjóna, alúð og dúnmjúkt garn að vopni.
Ástralskar mörgæsir eiga undir illvígt högg að sækja vegna olíuslyss sem varð við strendur álfunnar árið 2001, sér í lagi þær mörgæsir sem staðsettar eru nærri Phillip Island en það var í mars á síðasta ári sem umhverfisverndarsamtökin Knits For Nature sendu út formlegt neyðarávarp til almennings og biðluðu til prjónaáhugafólks. Mörgæsirnar þyrftu á hlífðarvestum að halda, ættu þær að hafa af þá umhverfismengun sem olíuspjöllin ullu á ástralskri náttúru.
Meðal þeirra sem brást við kallinu var svo enginn annar en Albert gamli, sem er ekki einungis elsti maður Ástralíu heldur gífurlega lunkinn í höndunum og prjónar undursamlega falleg hlífðarvesti sem má sjá kjagandi mörgæsir klæðast.
Albert er liðtækur með prjónana og vílar ekki fyrir sér að smella í eina peysu á dag
Albert hefur reyndar fengist við handavinnu í yfir áttatíu ár og hefur gaman að, en fyrsta stykkið sitt prjónaði Albert á ófæddan systurson sinn, þá ungur að árum. Hann er enn að og fær mikla lífsfyllingu út úr því einu að sinna náttúruvendarstörfum á þennan óvenjulega máta.
Slösuð og vönkuð mörgæs í hlífðarvesti líku því sem Albert prjónar fyrir dýrin
Prjónuðu hlífðarvestin eru mörgæsunum svo nauðsynleg, þar sem fuglunum er tamt að ýfa og snyrta fjaðrirnar í sífellu – en með því móti dreifa mörgæsirnar ekki einungis skaðlegum spilliefnum um allan kroppinn, heldur innbyrða einnig eiturefnin sem berast í meltingarveginn. Því eru fuglarnir færðir í prjónaðar peysur sem, að sögn hefur bjargað yfirgnæfandi meirihluta mörgæsa sem hafa orðið fyrir barðinu á illskeyttri menguninni.
Svona líta hlífðarvestin út sem Albert prjónar á vesalings mörgæsirnar
Hér má sjá örlítið brot af þeim hlífðarvestum sem mörgæsirnar klæðast og hinn 109 ára gamli Albert Date prjónar – í félagi við aðra ástralska sjálfboðaliða sem láta sig ástralska náttúruvernd varða.
Viðtal NineMSN við Albert gamla má skoða HÉR
Tengdar greinar:
Hjálpa heilli andafjölskyldu yfir götuna – Myndband
Geta rottur verið krúttlegar? – Myndir
Kviknaktir dýralæknanemar sprella í ástralskri náttúru
Klara Egilson er íslenskur blaðamaður búsettur í Osló. Hún hefur gengt ritstörfum frá unga aldri og gaf út sína fyrstu smásögu sex ára að aldri: “Kartaflan sem fann alltaf vitlausa lykt” en hefur skrifað allar götur síðan og er ekki ókunn íslenskum fjölmiðlum. Hún er elsk á orð, fagra muni og umfram allt; fjölbreytileika mannlífsins. Klara gegnir í dag stöðu aðstoðarritstjóra HÚN.IS og tekur á ýmsu í umfjöllunum sínum.
