Þriggja ára gömlum óprúttnum ökuþrjót einum í Myrtle Creek, Oregano, tókst nýverið að stela jeppabifreið sem stóð í heimkeyrslunni meðan barnapían, 22 ára gamall frændi drengsins, dottaði í sófanum.
Hinn óprúttni ökumaður ók jeppanum yfir gatnamót, íklæddur bleyjunni einni fata, stímdi þar næst á húsvegg, læddist út úr bifreiðinni og hljóp sem fætur toguðu heim til sín þar sem hann endaði ferðalagið uppi í sófa og þverneitaði öllu þegar lögregluna bar að garði til að inna eftir heilsu drengsins og atvikaröð.
Vettvangsmynd: Bleyjuklæddi bófinn ók á hús nágrannans og flúði berfættur í burtu.
Drengurinn, sem gárungarnir hafa gefið viðurnefnið „bleyjuklæddi bófinn” vegna klæðaburðar hans þegar hann rændi bifreiðinni, vakti athygli og áhyggjur vegfaranda sem varð vitni að ákeyrslunni og ofsafengnum flótta barnsins af vettvangi. Vegfarandinn hringdi í neyðarlínu lögreglunnar, en í yfirlýsingu sem lögreglan sendi frá sér segir svo:
„Vitni sem hafði samband við neyðarlínu sá barnið hlaupa eins og fætur toguðu í burtu frá bifreiðinni á bleyjunni einni fata. Barnið hljóp rakleiðis heim til sín …. mér tókst að hafa uppi á barninu og komast inn í húsið, en fann drenginn á bleyjunni – liggjandi í makindum sínum á sófanum með teiknimyndir í sjónvarpinu eins og ekkert hefði í skorist. Barnið neitaði staðfastlega sök og þóttist ekki kannast við neitt.”
Barnapía drengsins, 22 ára gamall karlmaður, sem hafði dottað á sófanum sjálfur, kom af fjöllum þegar lögregluna bar að garði en foreldrar drengsins höfðu brugðið sér frá í skamma stund og fengu gæslu fyrir drenginn á meðan. Foreldrar barnsins munu ekki sæta rannsókn vegna atviksins, en hinn 22 ára gamli karlmaður sem fenginn var til barnagæslunnar hefur hins vegar verið ákærður fyrir að „vanrækja skyldur sínar sem barnapía.”
Klara Egilson er íslenskur blaðamaður búsettur í Osló. Hún hefur gengt ritstörfum frá unga aldri og gaf út sína fyrstu smásögu sex ára að aldri: “Kartaflan sem fann alltaf vitlausa lykt” en hefur skrifað allar götur síðan og er ekki ókunn íslenskum fjölmiðlum. Hún er elsk á orð, fagra muni og umfram allt; fjölbreytileika mannlífsins. Klara gegnir í dag stöðu aðstoðarritstjóra HÚN.IS og tekur á ýmsu í umfjöllunum sínum.
