Daim og rjómi eru yfirnáttuleg blanda. Stórfengleg. Skákar mögulega sultu og rjóma. Svona næstum. Stingum svo kókosbollum, marengs og karamellum undir sömu sæng. Ó, boj – pant flytjast búferlum undir þá sæng.
Þessi bomba, ó þessi bomba – tekur enga stund að útbúa og enn skemmri tíma að stúta. Ég bauð í kaffi – hún kláraðist á ljóshraða og ég stóð mig svo að því að sleikja formið yfir vaskinum. Já, hún er svo ljúffeng að sæmilega dönnuð kona hefur skyndilega mannasiði á við máv.
Kókosbollubomba með Daimrjóma og karamellu
3 stykki tvöföld Daim
500 ml rjómi
1 stykki marengs að eigin vali (ég keypti tilbúinn)
4 kókosbollur
10 Dumle karamellur
Ber og ávextir til skrauts
Það má annað hvort saxa Daim-ið mjög smátt eða einfaldlega grýta því í matvinnsluvél. Ég kaus matvinnsluvélina.
Brjótum marengsinn niður í eldfast mót. Klínum kókosbollunum yfir. Vel og vandlega. Það má borða hálfa bollu. Það sleppur alveg.
Þeytum rjómann (skiljið eftir sirka 2 matskeiðar fyrir karamellusósuna). Daim-inu hrært varlega saman við. Síðan blöndum við öllu saman – marengs, kókosbollunum og rjómanum.
Jafnið blönduna í mótið. Skerið niður kiwi, jarðarber og hvað sem hugirnn girinst og smellið ofan á.
Svo er það karamellusósan. Elsku karamellusósan. 10 Dumle-karamellur í pott ásamt örlitlum rjóma. Bræðið saman við vægan hita. Leyfið sósunni að kólna aðeins áður en hún fer yfir bombuna. Ég legg til að hún sé smökkuð reglulega. Svona til þess að taka út hitastigið.
Sjússum sósunni yfir. Fram og til baka. Út og suður. Nóg af sósu. Út um allt.
Snargeggjuð og sjúklega góð. Sjúklega segi ég.
Gleðilega helgi og verði ykkur að góðu.
Guðrún Veiga er fædd og uppalin á Eskifirði. Hún er mannfræðingur að mennt, mikill matgæðingur, mamma og múltítasker. Guðrún Veiga hefur skrifað fyrir hina ýmsu miðla, unnið í sjónvarpi og skrifað eitt stykki matreiðslubók.
