Ég kíkti á dögunum á veitingastaðinn Burro ásamt tveimur vinkonum. Hann er rosalega notalegur, á flottum stað í miðbænum, þar sem mikið hefur verið lagt í skemmtilegar innréttingar. Hver einasta mubla hefur sál, svo ég tali nú ekki um litríkt teppið og sjarmerandi lýsinguna. Suðræn stemmningin er alltumlykjandi – án þess að vera kæfandi. Hinn gullni millivegur!
Ein af okkur er grænmetisæta og því hentaði það mjög vel að fara á Burro þar sem þeir eru með glæsilegan Vegan matseðil. Smáréttir eru í hávegum hafðir á Burro og það gerir það að verkum að maður getur prófað nokkrar tegundir á einu kvöldi. Mjög skemmtilegt ef maður er í hóp.
Við byrjuðum á að fá okkur Brokkolini, sem er brokkolí og sesamfræ sem eru steikt upp úr sesamsoja. Ótrúlega gott. Við fengum okkur líka ostastangir sem voru með sterkri sósu, ótrúlega stökkar og bragðgóðar – við hefðum alveg getað borðað okkur saddar af þeim. En það var eins gott að við gerðum það ekki því veislan var rétt að byrja.
Aðalréttirnir voru svo engin vonbrigði því þeir voru hver öðrum girnilegri og voru svo listilega lagðir á diskana, að maður tímdi varla að bragða á þeim og skemma listaverkið.
Steikt önd. Ég hef aldrei smakkað svona áður og öndin kom mér ótrúlega skemmtilega á óvart.
Kjúklinga taco-ið var æðislega gott og hráefnið var alveg brakandi ferskt.
Tófú-tacoið var ótrúlega gott. Skemmtilegt að fá svona stökkt tófú því það er ekki alltaf sem tófumatreiðsla heppnast vel. Það var gott og gagnlegt að fá heitan þvottapoka með!
Dásamlega mjúk og grilluð sellerírót
Þrátt fyrir að forréttirnir væru hver öðrum betri þá sló aðalrétturinn allt út. Dásamlega mjúk nautasteik, svo fullkomlega elduð að hún hreinlega bráðnaði í munni. Ekki spillti fyrir hvað diskurinn var skemmtilega litríkur og girnilegur á að sjá.
Það er svo skemmtilegt að Burro býður upp á að kaupa steik fyrir hóp. Heilgrilluð nautalund og meðlæti sem 3-4 geta deilt með sér. Frábært fyrir þig og vinina.
Kidda Svarfdal er ritstjóri og eigandi Hún.is en hún er frá Djúpavík á Ströndum. Hún fór á bát og snjósleða í skólann þegar hún var lítil og var í heimavist í Finnbogastaðaskóla. Hún hefur haft gaman að krossgátum og íslensku frá unga aldri og hefur skrifað ljóð, sögur, pistla og fleira. Ásamt því að skrifa á Hún.is er Kidda, ásamt fjölskyldu sinni, mikið í Djúpavík þar sem fjölskyldan er með ferðaþjónustu.
