Stundum eru einföldustu ráðin þau áhrifaríkustu.
Það eru eflaust margir sem hafa klórað sér í hausnum yfir því í gegnum tíðina, hvernig best sé að þrífa hina og þessa hluti og með hverju. Það er kannski engin ein rétt lausn á hverju vandamáli fyrir sig, en hér eru nokkrar sniðugar og áhrifaríkar lausnir, sem flestar eru tiltölulega umhverfisvænar í þokkabót.
Þrífðu skurðarbrettið með sítrónu
Sítrónusafi getur gert kraftaverk við að hreinsa erfiða bletti af bæði tré- og plastskurðarbrettum. Skerðu sítrónu í tvennt, kreistu smá safa úr og nuddaðu sárinu yfir brettið. Láttu standa í 20 mínútur og hreinsaðu svo brettið með vatnið.
Losaðu stíflu með matarsóda
Ef vatnið er farið að renna mjög hægt ofan í niðurfallið í vaskinum prófaðu þá að nota matarsóda og edik sem stíflueyði. Blandaðu saman hálfum bolla af matarsóda og hálfum bolla af ediki, helltu ofan í niðurfallið, leggðu rakan klút yfir og láttu standa í 5 mínútur. Taktu þá klútinn af og láttu heitt vatn renna í vaskinn.
Þurrkaðu af með kaffipoka
Ótrúlegt en satt þá er kaffipoki betri en nokkur microfiber tuska til að þrífa sjónvarps- og tölvuskjái. Kaffipokinn nær rykinu vel af og skilur ekki eftir sig neinar rákir.
Fjarlægðu hár með hanska
Hunda- og kattaeigendur kannast eflaust við það vandamál að dýrahárin loða við allt, sérstaklega kósí sófa, stóla og púða. Margir nota límrúllu til að fjarlægja hárin, en vandamálið við slíka rúllu er að hún getur skilið eftir sig lím sem hárin setjast enn frekar í. Besta ráðið er að strjúka af sófanum með rökum gúmmíhanska. Þannig nærðu öllum hárunum á einfaldan hátt og ekkert lím kemur við sögu.
Álpappír á matarleifar
Það getur stundum verið erfitt að ná matarleifum af eldföstum mótum, sérstaklega ef bráðinn og grillaður ostur kemur við sögu. Sniðug leið til að þrífa svona mót er að rúlla saman smá álpappír, setja á hann uppþvottalög og nudda. Viti menn, matarleifarnar renna af.
Heimildir: Fréttatíminn
Kidda Svarfdal er ritstjóri og eigandi Hún.is en hún er frá Djúpavík á Ströndum. Hún fór á bát og snjósleða í skólann þegar hún var lítil og var í heimavist í Finnbogastaðaskóla. Hún hefur haft gaman að krossgátum og íslensku frá unga aldri og hefur skrifað ljóð, sögur, pistla og fleira. Ásamt því að skrifa á Hún.is er Kidda, ásamt fjölskyldu sinni, mikið í Djúpavík þar sem fjölskyldan er með ferðaþjónustu.
