Að takast á við FOMO – Hagnýt ráð til að halda ró

Hafið þið ekki örugglega heyrt talað um FOMO? FOMO stendur fyrir „fear of missing out“ eða eins og það myndi þýðast „ótti við að missa af einhverju“. Við munum nota orðið FOMO í framhaldinu til að einfalda málið.

FOMO er tilfinning sem margir upplifa í hraðskreiðum heimi þar sem við erum stöðugt tengd internetinu. Þetta er kvíði yfir því að aðrir séu að upplifa ánægjulega hluti sem þú ert ekki þátttakandi í. Hvort sem það er félagslegur viðburður, atvinnumöguleiki, eða einfaldlega það að sjá vini skemmta sér á samfélagsmiðlum, getur FOMO leitt til tilfinninga um ófullnægju, vanlíðan og stöðugan samanburð. Hér eru nokkrar leiðir til að takast á við FOMO og halda fókus.

1. Viðurkenndu og skildu tilfinninguna

Fyrsta skrefið í að yfirstíga FOMO er að viðurkenna að það er eðlilegt að upplifa þessa tilfinningu stundum. Í stað þess að dæma sjálfa/n þig fyrir að finnast þú vera útundan, reyndu að átta þig á því að FOMO er náttúruleg og mannleg tilfinning sem er tengd félagslegum eðlishvötum okkar. Við erum félagsverur sem vilja tilheyra hópum, svo það er alls ekki óskiljanlegt að það, að missa af einhverju geti vakið upp kvíða.

2. Stundaðu þakklæti

Ein öflugasta leiðin til að takast á við FOMO er að beina athyglinni að því sem þú hefur nú þegar í stað þess að einblína á það sem þér finnst vanta. Að íhuga það, á hverjum degi, hvað þú getur verið þakklát/ur fyrir getur gert kraftaverk. Gefðu þér nokkrar mínútur á dag til að skrifa niður þrjá hluti sem þú ert þakklát/ur fyrir. Það hjálpar þér að beina athyglinni að þeim jákvæðu þáttum sem eru nú þegar í þínu lífi.

3. Takmarkaðu notkun samfélagsmiðla

Samfélagsmiðlar eru stór uppspretta FOMO, þar sem fólk sýnir oft gleðistundir sínar á skrautlegan hátt. Það er auðvelt að gleyma því að fólk setur oftast inn það besta úr lífi sínu, en ekki hversdagslegu eða erfiðu augnablikin. Með því að taka pásu frá samfélagsmiðlum eða setja tímamörk á notkun þeirra getur þú minnkað samanburðinn. Sumum finnst það líka hjálplegt að hætta á sumum miðlum og taka tilkynningarnar af í símanum, en það mun draga úr kvíða og óánægju.

4. Endurhugsaðu hlutina

Í stað þess að líta á hvert tækifæri sem „þú misstir af“ sem missi, reyndu að líta á það sem val. Hafðu það í huga að með því að taka ekki þátt í einhverju, ertu að skapa rými fyrir aðrar og dýrmætari upplifanir eins og hvíld, sköpun eða gæðastund með ástvinum. Með því að læra að segja „nei“ við því sem hentar þér ekki, færðu tíma til að gera það sem skiptir raunverulega máli.

5. Einbeittu þér að gildum þínum og markmiðum

Þegar þú finnur fyrir FOMO er auðvelt að týna sér í reynslu annarra. Í stað þess að fylgja straumnum skaltu stíga skref til baka og hugleiða þín eigin gildi og markmið. Eru hlutirnir sem þú ert að „missa af“ í samræmi við það sem þú vilt eða eru þeir bara truflanir? Með því að vera trúr því sem þú vilt raunverulega í lífinu verður auðveldara að standast freistinguna að bera þig saman við aðra.

6. Æfðu núvitund og vertu til staðar

FOMO kemur oft fram þegar við einbeitum okkur að því sem við erum ekki að gera frekar en því sem við erum að gera. Að æfa núvitund – að vera fullkomlega til staðar í augnablikinu – getur hjálpað þér við að finnast þú ekki vera að missa af. Reyndu að gefa þér tíma til að njóta þeirra athafna og tengsla sem þú hefur nú þegar. Hvort sem það er að borða máltíð, vinna eða eyða tíma með vinum, skaltu sökkva þér í reynsluna í stað þess að hafa áhyggjur af öðru sem gæti verið í gangi annars staðar.

7. Mundu að enginn getur upplifað allt

Það er ómögulegt fyrir nokkurn mann að taka þátt í hverjum einasta viðburði. Allir missa af einhverju á einhverjum tímapunkti, jafnvel þótt það líti ekki þannig út. Að sætta sig við þessa staðreynd getur minnkað pressuna um að þurfa að „vera alls staðar“ og gera allt. Lífið snýst um val, og hluti af því að vera hamingjusamur er að sætta sig við að við getum ekki tekið þátt í öllu.

8. Byggðu upp dýrmæt tengsl

FOMO er oft drifið áfram af löngun eftir tengslum. Í stað þess að eltast við hvern einasta viðburð, einbeittu þér að því að dýpka þau sambönd sem þú átt nú þegar. Þegar þú leggur tíma og kraft í dýrmæt og raunveruleg tengsl finnur þú meiri fyllingu og minni líkur á að upplifa einmanaleika eða óöryggi sem stundum fylgir FOMO.

9. Búðu til þína eigin skemmtun

Í stað þess að einblína á hvað aðrir eru að gera, af hverju ekki að skapa þína eigin gleði? Skipuleggðu athafnir sem þú elskar, hvort sem það er eitthvað sem þú gerir ein/n, eins og að lesa eða skapa, eða að bjóða vinum í eitthvað sem þú hefur virkilega áhuga á. Þegar þú tekur þátt í viðburðum sem gleðja þig verður þörfin til að bera líf þitt saman við aðra, minni.

10. Leitaðu jafnvægis og passaðu upp á þig

Það er mikilvægt að viðhalda jafnvægi í lífinu. FOMO getur stundum komið fram þegar það er brjálað að gera hjá þér og þú ert frekar buguð/aður. Gakktu úr skugga um að passa vel upp á þig, t.d. með því að sofa vel, slaka á og eiga frítíma. Þegar þú ert úthvíld/ur og hefur hugsað vel um þig eru minni líkur á því að þér finnist félagslegum þörfum þínum ekki fullnægt eða að þér finnist þú ekki vera með á nótunum.

Að lokum:

FOMO er algengt í nútímasamfélagi, en það þarf ekki að stjórna hugsunum þínum eða ákvörðunum. Með því að viðurkenna það, æfa þakklæti og einbeita þér að þínum eigin gildum geturðu breytt hugarfarinu frá skorti og samanburði yfir í innri ró. Mundu að lífið sem þú ert að byggja fyrir þig er jafn dýrmætt og það sem aðrir deila, og sönn hamingja kemur innan frá, ekki frá því sem þú heldur að þú sért að missa af.

---

Sjá einnig: