Samkvæmt kristilegum húsaga eiga menn bæði að flengja eiginkonurnar og tukta þær til.
Það skiptir þó nokkru máli fyrir þá sem fara að fyrirmælum Hins kristilega húsaga að þeir hafi athugað vel hvaða tól þeir eiga að nota. Hárbursti er t.d. ágætur því að hann stingur og rífur en verra er hvað hann brotnar auðveldlega. Tennisspaðinn er öflugur en það rífur ekki eins undan honum og ekki víst að kellan læri sína lexíu.
Þessar upplýsingar og fleiri eru meðal þess sem er tekið til og kennt í bæklingi fyrir þá sem eru að byrja beita kristilegum húsaga.
Í bæklingnum er hreyfingunni „ Kristilegur húsagi“ (Kh) lýst svona:
Kristilegur húsagi er það kallað þegar tveir lífsförunautar gera með sér samkomulag um að höfuð fjölskyldunnar (HF) gerir það sem gera þarf til þess að samband þeirra sé lifandi og gott; hann gerir það sem gera þarf til þess að andinn á heimilinu sé góður, hann gerir það sem gera þarf til að vernda alla á heimilinu fyrir illsku heimsins með því að refsa þeim sem sýndi af sér óæskilega hegðun – fjölskyldunni til heilla.
Þeir sem fylgja fyrirmælum Kh hreyfingarinnar nota hýðingar og ýmsar aðrar refsingar til að halda uppi lögum og reglu, kristilegum húsaga, eins og lýst er á heimasíðu samtakanna www.christiandomesticdiscipline.com. Karlinn ræður og konar hlýðir eins og mælt er fyrir í biblíunni að skuli vera.
Þessar skýringar koma ekki heim og saman við hugmyndir meiri hluta fólks sem álítur að hér sé um að ræða einhvers konar afbrigðilega kynlífshegðun (hlekkja fólk, berja það o.s.frv.) sem fólk stundar til að fá kynferðislega fullnægingu.
Samtökin segja hins vegar að síða þeirra sé alls ekki einhver „flengingasíða“ og sjái ekki um að koma fólki á stefnumót eða segi sögur af bólförum eða einhverju óeðli.
Samtökin hafa starfað sem slík árum saman en komust nýlega í fréttirnar þegar blaðið Daily Beast birti viðtal við höfunda bæklingsins sem áður var nefndur. Í viðtalinu er sagt að mörg þúsund hjón séu í þessum samtökum og þau hafi valið þessi jákvæðu og hollu samskipti. Blaðamaðurinn Laura Rubino hefur farið yfir tölvupósta á netinu og færslur á fésbókasíður fólks í samtökunum og hún segir að yfirleitt séu yfirlýsingar og athugasemdir sem flestar eru frá konum jákvæðar.
Hún segir að konurnar lýsi margar hvað þeim líði vel þegar þær hafa verið hýddar og beittar refsingum og trúa því að eiginmaðurinn hafi sýnt þeim mikla ást með barsmíðunum. Honum sé annt um hjónabandið og vilji hjálpa konu sinni til að hemja hegðun sína. Að lokinn hýðingu hafi þær hreint borð. Hjá þeim sé engin streita og vanlíðan eins og verður þegar fólk er að rífast. Kristilegur húsagi eyði öllu slíku.
En Rubino er nú ekki alveg sannfærð um að svona sé þetta alls staðar. Hún komst að því að sumar konurnar lifa í sífelldum ótta og sjá enga leið út úr ógöngunum.
Sálfræðingurinn Jim Alsdurf, sem hefur rannsakað „kristilegt heimilisofbeldi“ telur að það þurfi meira en meðalfífl til að trúa þessum hamingjusögum. Samband sem byggir á því að auðmýkja konuna hlýtur að vera í miklu ólagi, segir hann.
Séra Bryan Fischer rekur kristilega útvarpsstöð og hann hefur löngum predikað að maðurinn sé höfuð konunnar en hann frábiður sér nokkuð sambandi við þennan hóp.
„Þetta er skelfileg lífsstefna, furðuleg og ókristileg og á sér engan grunn í biblíunni. Þar eru eiginmenn minntir á að helga sig konu sinni og leggja sjálfa sig í sölurnar fyrir hana (Efes. 5:25) og eigi þeir á allan hátt að veita þeim virðingu (1.Pét. 3:7)“. Hann heldur áfram og segir að talsmenn samtakanna Kh annað hvort skilji ekki biblíuna eða snúi út úr orðum hennar og fyrirmælum.
Talið er að þeim fari sífjölgandi í Bandaríkjunum sem aðhyllast aðferðir og kenningar Kh hreyfingarinnar. Karlar sem fylgja stefnunni hafa tjáð sig um að þessi lífssefna auðgi andlegt líf þeirra. Þeir eigi með að iðka trú sína á þann hátt sem hentar þeim best og túlka biblíuna eins og þeir telja að sé rétt. Þeir segja líka að konurnar sem búa í svona hjónaböndum hafi samþykkt að svona skuli sambandið vera.
Hvað finnst okkur hinum sem kætumst ekki við þá tilhugsun að eiginmaðurinn berji okkur?
