Þann 12. janúar síðastliðinn lentu Anna Jóna Sigurbjörnsdóttir 16 ára og Skarphéðinn Andri Kristjánsson 18 ára í árekstri við flutningabifreið á Vesturlandsveginum. Anna Jóna lést í slysinu en Skarphéðinn slasaðist alvarlega og var fluttur á gjörgæslu. Skarphéðinn og Anna Jóna voru par.
Skarphéðinn barðist fyrir lífi sínu en hafði því miður ekki betur og lést í dag, á þriðja tímanum, samkvæmt fréttum á DV.is en haft var eftir móður Skarphéðins, Steinunni Rósu Einarsdóttur: „Skarphéðinn Andri okkar kvaddi okkur í dag kl. 14:35 og er nú kominn til Önnu Jónu sinnar.Þrátt fyrir harða baráttu og mikinn vilja allra á gjörgæslunni þá hafði Skarphéðinn ekki betur í þessari glímu. Hann verður þó enn öðrum til góðs því búið er að hafa samband við sjúkrahús í Svíþjóð og mun hluti hans lifa áfram í öðrum. Við þökkum stuðninginn og kveðjurnar. Munum svo einkunnarorð Skarphéðins; Allt sem að þér viljið að aðrir menn gjöri yður, það skuluð þér og þeim gjöra.“
Blessuð sé minning þessara tveggja ungmenna og megi guð veita aðstandendum þeirra styrk á þessum erfiðu tímum.
Kidda Svarfdal er ritstjóri og eigandi Hún.is en hún er frá Djúpavík á Ströndum. Hún fór á bát og snjósleða í skólann þegar hún var lítil og var í heimavist í Finnbogastaðaskóla. Hún hefur haft gaman að krossgátum og íslensku frá unga aldri og hefur skrifað ljóð, sögur, pistla og fleira. Ásamt því að skrifa á Hún.is er Kidda, ásamt fjölskyldu sinni, mikið í Djúpavík þar sem fjölskyldan er með ferðaþjónustu.