Ég er mjög hrifin af góðum núðluréttum. Þá er ég ekki að tala um svona yum yum núðlur, heldur matarmiklar og bragðgóðar núðlur. Það er líka frábært að elda kjúklinganúðlur í kvöldmat og taka svo afganginn með sér í nesti daginn eftir. Þessi uppskrift að kjúklinganúðlum varð til í eldhúsinu heima hjá mér fyrir nokkrum árum og hefur lifað góðu lífi. Þetta er einn af þeim réttum sem fjölskyldan biður reglulega um og auðvitað verður maður við þeirri beiðni!
2-3 kjúklingabringur
2 msk thai sweet sósa
1 msk hoisin sósa frá Blue Dragoon
2-3 tsk vatn
1 hvítlauksrif
1/2 brokkolíhöfuð
1/2 rauð paprika
1/2 meðalstór kúrbítur
2 stórar gulrætur
Eggjanúðlur frá Blue Dragoon
Aðferð
1. Hitið olíu á pönnu. Skerið kjúklinginn í bita og steikið á pönnunni.
2. Sjóðið núðlur samkvæmt leiðbeiningum á pakka.
3. Skerið grænmetið.
4. Bætið grænmetinu út á pönnuna, lækkið hitann aðeins og steikið áfram í 10-15 mín.
5. Hellið hoi sin sósu, thai sweet sósu og vatni í skál og pressið hvítlauksrif út í. Hrærið saman og hellið út á pönnuna. Hrærið allt saman.
6. Hellið vatninu af núðlunum og setjið núðlurnar á pönnuna. Slökkvið undir og hrærið allt saman.
Berið fram og njótið vel!
Birna er tvítug Reykjavíkurmær. Hún er stúdent frá Verzlunarskóla Íslands og hefur mikinn áhuga á mataræði og heilbrigðum lífsstíl. Birna stundar Boot Camp, hlaup og lyftingar af kappi. Hún er dugleg að takast á við krefjandi áskoranir og leika lausum hala utan þægindarammans. Hvort sem það er utanvegahlaup, kraftlyftingar, þrekkeppnir eða annað í þeim dúr. Birna mun deila uppskriftum úr eigin tilraunaeldhúsi með lesendum Hún.is ásamt því að skrifa skemmtilega og upplífgandi pistla er snúa að heilbrigðum lífsstíl og sjálfsrækt.
