Á mínu heimili reynum við að hafa fisk í kvöldmatinn að minnsta kosti tvisvar í viku. Ég er mjög gjörn á að prófa eitthvað nýtt og leika mér með hráefnið. Ýsa og kartöflur er alltaf algjört lostæti og það má útfæra það á marga ólíka vegu. Karrí kemur reglulega við sögu í tilraunaeldhúsinu og gerði það gott mót í þessu ljúffenga fiskifati. Virkilega hollt og gott í miðri vinnuviku. Ég bar fatið fram með rósmarín kartöflum, soðnu bankabyggi og grænmeti. Allir fóru sáttir og sælir frá borði, enda ekki við öðru að búast.
Fiskifatið
600 – 700 grömm ýsa eða þorskur
1 msk jómfrúarólífuolía
1 venjulegur laukur
2 hvítlauksrif
1 cm bútur engifer
1 ½ msk milt karríduft
2 tsk cumin
salt og pipar
400 ml kókosmjólk (ekki fituskert eða “lite”)
1 msk maizena + ¾ dl vatn
½ rauð paprika
1 brokkolíhaus
5-6 sveppir
¼ ferskur ananas
Konfekttómatar
½ gráðaostur
Rósmarín kartöflur
500 gr. kartöflur
1 msk jómfrúarólífuolía
2 tsk rósmarín
1 tsk paprikuduft
Aðferð – Fiskifat
1. Hitið olíu á pönnu og steikið saman lauk, engifer og hvítlauk í 3-4 mínútur
2. Bætið karrídufti, cumin, salti og pipar á pönuna og blandið öllu vel saman.
3. Hellið kókosmjólk út á pönnuna og látið malla í nokkrar mínútur.
4. Hrærið maizena mjölið út í vatni og hellið því á pönnuna. Leyfið sósunni svo að malla áfram á vægum hita og þykkna.
5. Skerið niður papriku, brokkolí, sveppi og ananas og bætið við sósuna. Hafið áfram á pönnunni á vægum hita meðan þið hugið að fiskinum. Hrærið reglulega upp í.
6. Hitið vatn í potti þar til fer að sjóða. Skerið fiskinn niður í miðlungs stóra bita.
7. Látið fiskinn út í sjóðandi vatnið í 1 mínútu og takið þá aftur upp úr. Þannig losnið þið við vökvann úr fiskinum.
8. Færið grænmetis- og karrýblönduna í eldfast mót.
9. Leggið fiskinn ofan á grænmetið. Skerið konfekttómata í fernt og raðið þeim ofan á. Saltið og piprið.
10. Myljið gráðaostinn yfir og bakið við 175 gráður í 12-15 mínútur.
11. Takið út og berið fram ásamt meðlæti.
Aðferð – Rósmarín kartöflur
1.Sjóðið kartöflur í potti.
2.Hitið pönnu með olíu. Flysjið kartöflurnar, skerið þær í fernt og steikið upp úr olíunni. Bætið við rósmarín og paprikudufti. Hrærið vel saman.
3.Steikið á miðlungs hita í nokkrar mínútur, fer eftir því hversu gylltar þið viljið hafa þær.
4. Berið fram.
Birna er tvítug Reykjavíkurmær. Hún er stúdent frá Verzlunarskóla Íslands og hefur mikinn áhuga á mataræði og heilbrigðum lífsstíl. Birna stundar Boot Camp, hlaup og lyftingar af kappi. Hún er dugleg að takast á við krefjandi áskoranir og leika lausum hala utan þægindarammans. Hvort sem það er utanvegahlaup, kraftlyftingar, þrekkeppnir eða annað í þeim dúr. Birna mun deila uppskriftum úr eigin tilraunaeldhúsi með lesendum Hún.is ásamt því að skrifa skemmtilega og upplífgandi pistla er snúa að heilbrigðum lífsstíl og sjálfsrækt.
