Á Akranesi stendur þetta huggulega raðhús á tveimur hæðum. Húsið er um 268 fm. en innréttingarnar eru allar sérsmíðaðar hjá Trésmiðju Akraness. Lofthæðin er mikil í aðalrýminu, en á gólfum eru kremaðar flísar sem tóna vel við innréttingarnar. Baðherbergin eru flísalögð og á aðalbaðherberginu er vegleg og stór sturta með glerskilrúmi. Svefnherbergin eru þrjú og inn af hjónaherbergi er fataherbergi. Í kjallaranum er fjölskyldurými sem hefur verið hólfað af með tveimur léttum milliveggjum. Hringinn í kringum húsið er stór sólpallur sem samanstendur af timbri og hellulögn og þar er að finna heitapott. Þetta er virkilega skemmtileg eign og er til sölu á um 59 milljónir.
Árni býr í Reykjavík en ólst upp í Garðinum. Hann lauk stúdentsprófi frá Fjölbrautaskóla Suðurnesja og nam stjórnmálafræði við Háskóla Íslands. Að því gefnu hefur hann mikinn áhuga á stjórnmálum, ásamt því að vera mikill áhugamaður um hönnun, arkitektúr og ljósmyndun. Árni hefur gaman að tónlist og leiklist, kvikmyndum og matargerð annarra. Hann viðurkennir fúslega að vera ömurlegur í eldhúsinu og leggur ekki á nokkurn mann að koma í mat til sín. Nýja dellan er að vaða um íslenska náttúru með myndavélina og reyna að ná góðum myndum með misjöfnum árangri. Árni er mikil félagsvera og nýtur sín best í góðra vina hópi og með fjölskyldunni. Hann er dýravinur, en gengur illa að eiga gæludýr. Þau annað hvort drepast eða flýja af heiman. Árni gleymir sér á netinu við að skoða fallega hönnun, heimili og fasteignasíðurnar eru í miklu uppáhaldi. Árni deilir með okkur því sem hann fellur fyrir hverju sinni og reynir að koma víða við í stílum og hönnun til að ná til sem flestra. Árni heldur úti Facebooksíðu þar sem hann deilir hugðarefnum sínum, enda kallar hann síðuna Hugarheim Árna.
