Klassísk tónlist kann að vera hádramatísk í flutningi og meðförum hljóðfæraleikara, en þar með er þó ekki sagt að meðlimir sinfóníuhljómsveita séu með öllu gersneyddir húmor.
Sinfóníuhljómsveit Danmerkur ákvað þannig að bregða á leik en allir meðlimir hljómsveitarinnar tróðu – einhverra hluta vegna – rótsterkum pipar upp í sig og smjöttuðu duglega á meðan sinfóníuhljómsveitin flutti hið gullfallega verk Tango Jalousie.
Útkoman er stórslys, en meðlimir reyna þó sitt albesta til að viðhafa lágmarks sjálfsstjórn meðan á flutningi stendur. Og upp að ákveðnu marki ferst þeim flutningurinn vel úr hendi. Hafið þó hugfast að það er ekki auðvelt að spila á hljóðfæri með rótsterkan pipar í munninum.
Í raun er ótrúlegt að flutningur skuli hafa tekist svo vel sem sjá má hér að neðan,en sjálfur stjórnandi sinfóníusveitarinnar tók þátt í sprellinu. Þá er bara einni spurningu ósvarað: HVAÐ GEKK FÔLKINU EIGINLEGA TIL?
Klara Egilson er íslenskur blaðamaður búsettur í Osló. Hún hefur gengt ritstörfum frá unga aldri og gaf út sína fyrstu smásögu sex ára að aldri: “Kartaflan sem fann alltaf vitlausa lykt” en hefur skrifað allar götur síðan og er ekki ókunn íslenskum fjölmiðlum. Hún er elsk á orð, fagra muni og umfram allt; fjölbreytileika mannlífsins. Klara gegnir í dag stöðu aðstoðarritstjóra HÚN.IS og tekur á ýmsu í umfjöllunum sínum.
