Um daginn var ég, ásamt fjölskyldunni, á röltinu í New York þegar við rákumst á gríðarstórt tjald og mikið umstang. Okkur var sagt að þarna væri sjónhverfingamaðurinn David Blaine að gera eina af sínum áhættulistum. Hann stóð uppi á stólpa í járngalla og var með milljón vatta straum tengdan við sig í 3 heila sólarhringa.
Þegar við löbbuðum inn á svæðið voru okkur réttir eyrnatappar sem okkur var skylt að nota sem við að sjálfsögðu gerðum. David var að vesenast eitthvað við að veita viðtöl en hann gerði það með því að flytja blaðamennina upp til sín og tala við þá í hurðinni á lítilli lyftu. Ég gaf mig á tal við einn starfsmanninn á svæðinu, var forvitin um þetta og ég spurði hann fyrst af hverju David væri að gera þetta og þá hló hann bara og sagði „Þetta er bara David“ (hann sagði þetta að sjálfsögðu á ensku:)). Svo sýndi hann mér tölvu með fullt af trixum sem David hefur gert, en ég þekki alveg sögu hans og veit hvað hann gerir svo ég skoðaði það ekkert mikið.
Ég spurði svo manninn hvort hann stæði þarna uppi samfleytt í 3 daga og hann jánkaði því og ég spurði þá hvernig hann borðaði og hann sagði að David borðaði ekki í þessa 3 daga. Ok…. það er alveg eðlilegt! Ég tók líka eftir því að David stóð þarna og hallaði sér örlítið afturábak og spurði hann af hverju hann stæði svona og þá sagði maðurinn að hann væri alveg að sofna enda væru bara 8 klukkustundir eftir af 36 klukkustundum svo hann væri orðinn þreyttur.
Þegar þarna var svo komið sögu þá fór David að hurðinni á lyftunni og einhver maður kom upp til hans og þeir voru eitthvað að vesenast með eitthvað lak og eitthvað og þá spurði ég manninn hvernig David færi eiginlega á klósettið og maðurinn svaraði „hann er með þvaglegg“ og næsta spurning kom bara sjálfkrafa og ég sagði „en þegar hann þarf að gera númer 2?“ og maðurinn svaraði: „Það eru líka gerðar ráðstafanir til þess að hann þurfi ekki að fara á klósettið til þess heldur.“
Svo spurði ég auðvitað hvað þeir væru að vesenast þarna núna með þetta lak og svarið var: „Ég held að það sé verið að laga þvaglegginn.“
Ég lét að sjálfsögðu smella af mér mynd „með honum“ við þetta skemmtilega tilefni 🙂
Kidda Svarfdal er ritstjóri og eigandi Hún.is en hún er frá Djúpavík á Ströndum. Hún fór á bát og snjósleða í skólann þegar hún var lítil og var í heimavist í Finnbogastaðaskóla. Hún hefur haft gaman að krossgátum og íslensku frá unga aldri og hefur skrifað ljóð, sögur, pistla og fleira. Ásamt því að skrifa á Hún.is er Kidda, ásamt fjölskyldu sinni, mikið í Djúpavík þar sem fjölskyldan er með ferðaþjónustu.
