Lengi má gott bæta, er það ekki? Ég elska Pågen snúða. Ég elska hvítt súkkulaði. Og ég elska karamellu. Af hverju ekki að setja þetta allt í sömu sæng? Það er nú einu sinni laugardagur. Svo er líka sumar. Þá má borða góðgæti alla daga. Að minnsta kosti í mínum bókum. Verst að buxurnar mínar eru ekki sammála. En hvað um það, snúum okkur að snúðunum.
Þetta eru einfalt. Fljótlegt. Og sjúklega gómsætt.
Pågen kanilsnúðar með hvítu súkkulaði & karamellu
1 og 1/2 poki af Pågen snúðum
100 gr hvítt súkkulaði
1/2 poki Góu kúlur (lögg af rjóma eða mjólk til þess að bræða með)
saxaðar pekanhnetur eftir smekk
Röðum snúðunum mjög þétt í eldfast mót, kökuform eða djúpan disk.
Bræðum hvíta súkkulaðið og slettum því vel og vandlega yfir snúðana. Fram og til baka. Út og suður.
Stingum þessu svo inn í ísskáp á meðan kúlurnar eru bræddar.
Karamellunni er skvett yfir á sama hátt og súkkulaðinu. Í lokin er gott að dreifa dálítið af pekanhnetum yfir herlegheitin.
Þetta er hættulega gott. Stökkar hnetur, silkimjúk karamella, sætt súkkulaði og dásamlegir snúðar. Hér getur ekkert farið úrskeiðis. Mmm.
Guðrún Veiga er fædd og uppalin á Eskifirði. Hún er mannfræðingur að mennt, mikill matgæðingur, mamma og múltítasker. Guðrún Veiga hefur skrifað fyrir hina ýmsu miðla, unnið í sjónvarpi og skrifað eitt stykki matreiðslubók.
