Gucci tók tískupallana með trompi á tískuvikunni í Milano þann 18 september, en vor- og sumarlína 2015 ber sterkan keim af sjöunda áratugnum og var engu líkara en að tímasveifinni hefði verið snúið aftur um heil fjörtíu ár þegar fyrirsætur stigu á svið.
Stuttir pilsfaldar; æpandi mynstur með sækadelísku ívafi og undirliggjandi sjóræningáhrif mátti gæta á sýningunni sjálfri með bróderingum, hnöppum í yfirstærð og stuttum jökkum úr mongólsku lambskinni og snákshúð.
Útvíð, svífandi buxnasnið og eggjandi, glæstar kvenkápur með aðsniðnu mitti mátti einnig sjá á tískupöllunum en það mun vera eitt verst geymda leyndarmál bransans að höfuðhönnuður Gucci, Frida Giannini er einlægur aðdáandi hippatímabilsins og virðist sem hún hafi gengið alla leið í hönnun á vor- og sumarlínu komandi árs.
Kvöldlína Gucci var seiðandi ásýndar, munúðarfullir kvöldkjólar úr fisléttu efni; silki, krep og tjull mátti sjá og mynstrið er stórbrotið, litagleðin allsráðandi sem vó skemmtilega upp á móti fíngerðu efninu.
Glæst lína frá Gucci sem leggur línurnar fyrir komandi vor og sumar, en hér má sjá sýningu Gucci eins og hún kom áhorfendum fyrir sjónir á tískuvikunni í Milano í síðustu viku:
Klara Egilson er íslenskur blaðamaður búsettur í Osló. Hún hefur gengt ritstörfum frá unga aldri og gaf út sína fyrstu smásögu sex ára að aldri: “Kartaflan sem fann alltaf vitlausa lykt” en hefur skrifað allar götur síðan og er ekki ókunn íslenskum fjölmiðlum. Hún er elsk á orð, fagra muni og umfram allt; fjölbreytileika mannlífsins. Klara gegnir í dag stöðu aðstoðarritstjóra HÚN.IS og tekur á ýmsu í umfjöllunum sínum.
