Flestir gera sér grein fyrir mikilvægi þess að þvo sér vel um hendurnar en samt sem áður er handþvotti oft ábótant. Rannsóknir hafa sýnt að með því að þvo sér vel og reglulega um hendurnar er hægt að draga verulega úr líkum á smiti og þannig minnka líkur á að veikjast sjálfur. Ein rannsókn sem framkvæmd var í Háskólanum í Arizona sýndi fram á að það tók ekki nema 30 mínútur fyrir sýkla að dreifast frá símtóli á skrifstofu og hurðahúnum yfir á lyklaborð, penna, hendur og andlit starfsmanna. Þetta gerist þegar starsfmenn snerta sýkt svæði ( eins og hurðahún) og bera sýklana með sér á höndunum áfram á næsta hlut sem þeir snerta. Með handþvotti er hægt að rjúfa þessa smitleið og þess vegna er handþvottur viðurkenndur sem mikilvægasta sýkingarvörnin sem hægt er að viðhafa. Þeir staðir þar sem mestar líkur eru að mikið sé af sýklum eru staðir sem margir snerta eins og:
Afgreiðsluborð
Lyftuhnappar og handrið í rúllustigum
Handföng á innkaupakerrum
Leiksvæði barna ( inni)
Líkamsræktartæki Pennar við afgreiðslukassa
og margir fleiri…
Það er mikilvægt að þvo sér um hendur … eftir að hafa haldið fyrir munninn eftir að hafa hóstað eða hnerrað/snýtt sér, líka þó notað sé bréfklútur eða vasaklútur. eftir að hafa notað á baðherbergið. fyrir og eftir meðhöndlun á hráum mat. fyrir neyslu matvæla. eftir að hafa notað hraðbanka eða handleikið peninga. eftir að hafa notað almenningssíma, penna á afgreiðslukössum, rúllustiga, lyftur og annað slíkt.
Hvernig á að þvo hendur: Bleyta þær fyrst með volgu vatni Sápa vel í 10-15 sekúndur og muna að hreinsa vel milli fingra og undir nöglum. Þumalfingur og handarbök verða gjarnan útundan Skola sápuna vel af með volgu vatni og þurrka vel.
Mælt er með því að nota bréfþurrkur eða blásara til að þurrka hendur á almenningsalernum (Skólar, leikskólar, vinnustaðir oþh.). Gott er að nota bréfþurrkuna til að skrúfa fyrir kranann til að hendurnar mengist ekki á ný.
Munum svo að við erum fyrirmyndir barnanna okkar og það þarf að kenna þeim að þvo sér um hendur líka.
Kidda Svarfdal er ritstjóri og eigandi Hún.is en hún er frá Djúpavík á Ströndum. Hún fór á bát og snjósleða í skólann þegar hún var lítil og var í heimavist í Finnbogastaðaskóla. Hún hefur haft gaman að krossgátum og íslensku frá unga aldri og hefur skrifað ljóð, sögur, pistla og fleira. Ásamt því að skrifa á Hún.is er Kidda, ásamt fjölskyldu sinni, mikið í Djúpavík þar sem fjölskyldan er með ferðaþjónustu.
