Þetta kartöflusalat er eiginlega alveg stórfenglegt. Það er gott með grillmat, góðri sunnudagssteik eða bara beint upp úr skálinni með skeið. Salatið er langbest ef það fær að standa inni í ísskáp yfir nótt. Það er þó ekki nauðsynlegt.
Sjá einnig: Kjúklingasalat með BBQ- dressingu
Heimsins besta kartöflusalat
1 kíló kartöflur
1 bréf beikon (200 grömm plús)
1 rauðlaukur
1 paprika
vænn brúskur af spergilkáli
1 dós sýrður rjómi (10%)
1 lítil dós majones
2 teskeiðar dijon sinnep
Dill
Sítrónupipar
Salt
Pipar
Örlítið karrí
Sjá einnig: Kurlkjúklingur með sætkartöflusalati – Uppskrift
Skrallið kartöflurnar og sjóðið þær. Leyfið þeim að kólna alveg áður en þær eru skornar í bita. Sjóðið spergilkálið í 4-5 mínútur. Þerrið það vel. Saxið það smátt ásamt lauknum og paprikunni. Steikið beikonið þar til það er orðið stökkt, látið kólna og saxið smátt.
Blandið saman majonesi, sýrðum rjóma og dijon sinnepi í skál. Kryddið og smakkið ykkur til. Smellið svo kartöflum, beikoni og grænmeti ofan í blönduna og hrærið vel saman.
Guðrún Veiga er fædd og uppalin á Eskifirði. Hún er mannfræðingur að mennt, mikill matgæðingur, mamma og múltítasker. Guðrún Veiga hefur skrifað fyrir hina ýmsu miðla, unnið í sjónvarpi og skrifað eitt stykki matreiðslubók.
