Í íslensku orðabókinni er orðið hjónadjöfull skilgreint sem sú eða sá sem spillir hjónabandi, þá spyr ég er maður ekki bara hjónadjöfull í sínu eigin hjónabandi? Er það ekki á ábyrgð þeirra sem í hjónabandinu eru að spilla því ekki sjálfir?
Því langar mig að segja mína sögu og ætla ég að gera það í bréfi til konu mannsins sem ég hélt við. Ég veit að ég hef sært hana og ég veit að ég hef sært fyrrverandi manninn minn. Ólíkt manninum sem ég hélt við og varð yfir mig ástfangin af þá ætlaði ég að ganga alla leið og hefja nýtt líf með honum eins og hann sagðist vilja gera með mér. Þannig að sá sársauki sem við ullum öðrum hafði í raun tilgang sem fauk svo út um gluggann þegar hann gat ekki klárað sinn skilnaði og hafið nýtt líf með mér.
Kæra Jackie
Mér finnst eðlilegt að þú fáir að vita allan sannleikann ekki bara það sem Kennedy er búinn að hvítþvo fyrir þig. Þetta er óhjákvæmilega skrifað í einhverri biturð og reiði því mér finnst hafa verið illa komið fram við okkur báðar. En ég er að segja sannleikann sem þú hefur ekki verið að fá á hverjum degi. Ég hefði aldrei leyft mér að verða ástfangin af Kennedy nema vegna þess að hann hefur nánast frá fyrsta degi sagst elska mig og látið í það skína að ég sé stóra ástin í lífi hans og hann ætli að vera með mér.
Mér finnst ótrúlega dapurt að ég sé úthrópuð sem hjónadjöfull eða siðlaus hóra þegar hann sagði mér strax í byrjun mars 2018 þegar við hittumst fyrst, að hann væri búinn að vera óhamingjusamur í hjónabandinu í 2 ár. Það er spurning hver er meiri djöfull?
En það var hann sem setti punktinn yfir i-ið í mínu hjónabandi svo væntanlega eru þá tveir hjónadjöflar hér á ferð bæði ég og Kennedy. Hann sagði líka að það hafi bara verið tímaspursmál hvenær hann myndi skilja og ef hann hefði ekki hitt mig hefði hann samt skilið. Auðvitað sagði hann strax frá því hversu sveltur hann væri í rúminu ásamt öðrum hlutum sem væru ekki í lagi og því væri það orðið þannig að hann liti bara á þig sem vin og þætti vænt um þig og að hann gæti ekki lengur lifað eftir þeirri glansmynd sem væri búið að gera hjónaband ykkar að.
Eftir að hafa verið í sambandi í ca tvo mánuði varð ég svo ófrísk og hann varð svo hamingjusamur og sagði mér að hann væri tilbúinn að eignast þetta barn með mér, ég missti fóstur og hann var ekki meiri maður en svo að stuðningurinn sem hann veitti var „hvað get ég gert, ég er með stór fjölskyldunni í sumarbústað“ og þar sem hann er alltaf svo „ljúfur og góður“ þá passaði ég mig alltaf að kasta ekki steini í glerhúsið hans.
Ég veit að þú segir að ég sé að ljúga en ég vildi óska að svo hefði verið, því þá hefði ég ekki þurft að ganga í gegnum þá líkamlegu og andlegu vanlíðan sem þessu fylgdi. Þegar þú svo varðst fyrst uppvís af sambandi okkar var skilnaður minn við fyrirverandi manninn minn að ganga í gegn en Kennedy ákvað að slíta okkar sambandi og fara aftur heim til þín. Það stóð í eina eða tvær vikur og þá byrjuðum við að hittast aftur. Ég vildi óska að þar hefði ég sagt stopp en því miður var ég bara svo illa farin eftir fósturmissi og yfir mig ástfangin að ég gerði það ekki.
Svo komst upp um okkur aftur og aftur fór hann heim. Við hittumst lítið síðasta sumar en áttum alltaf í reglulegum samskiptum og hann sagði mér að hann hefði aldrei ætlað að hætta að tala við mig vildi bara bíða og láta allt róast heima hjá ykkur. Við fórum að hittast aftur í byrjun október og höfum hist daglega stundum oftar en einu sinni á dag síðan. Ég hef setið tvenna tónleika með þér og honum, fyrst í vor þegar dóttir ykkar var að syngja og hann bauð mér að koma og svo núna um jólin (þá var mér reyndar boðið án þess að ég vissi í fyrstu hvaða tónleikar þetta væru) en ég bauð honum að sleppa því að mæta en hann sagði nei, og ég veit að í bæði skiptin var þetta að veita honum mikla spennu að hafa mig þarna.
Við Kennedy fórum í nokkra tíma í pararáðgjöf og hann fór líka í tíma einn, þar sem farið var í gegnum ýmsa hluti og þar á meðal hvort við vildum í raun fara að vera saman. Hvort hann vildi skilnað eða ekki og þá á hvaða forsendum. Forsendurnar voru að hann elskaði mig og að hjónaband ykkar væri ekkert hjónaband lengur. Ég marg spurði hann hvort hann teldi sig vera að taka rétta ákvörðun og hann sagðist vera alveg viss þar sem hann hafi aldrei fundið svona sterkar tilfinningar gangnvart annari konu eins og hann fann gagnvart mér. Hann ákvað að skilja og gerði það sem hann þurfti til þess. Hann kom beina leið til mín fyrsta kvöldið og var alla þá viku hjá mér og meira og minna eftir það, og það var komið það langt að hann var farinn að skutla börnunum mínum í skólann.
Fyrir ca viku fórum við í Smáralindina og ég hjálpaði honum að velja föt sem hanga nú inn í skáp heima hjá þér ásamt jólagjöfinni frá mér gerir ég ráð fyrir. Við fórum svo saman út á lífið það kvöld og hann kynnti mig fyrir öllum félögum sínum, og sagði mér hvað hann væri stoltur að geta kynnt mig sem kærustuna sína.
Eftir helgina kom hann svo til mín og sagðist verða að fara heim af því hann væri svo mikil gunga og hann gæti ekki klárað skilnaðinn af því hann saknaði svo barnanna (sem ég skil vel) og hann gæti ekki valið á milli mín og þeirra, okkar sem hann elskaði mest í lífinu. Ég spurði hann hvað hann ætlaði að gera þegar að börnin færu að heiman, hann svaraði „halda leikritinu áfram“. Þegar hann gekk út var það síðasta sem hann sagði „ég elska þig“. Þremur til fjórum tímum seinna var hann fluttur aftur til þín „þessi góði maður“ og búinn að blocka mig allsstaðar.
Þú ert búin að taka við honum til baka frá mér þrisvar sinnum. Það er undir þér komið hvað þú gerir með þetta sem ég hef sagt þér, en hann er svo sannarlega langt því frá að vera heiðarlegur maður og guð má vita hverju hann hefur logið að okkur báðum, þér og mér um hvora aðra. Auðvitað veit ég að það sem ég gerði var ekki rétt, en fyrir mér var það rétt því ég hafði gert hreint fyrir mínum dyrum gagnvart fyrrverandi manninum mínum. Ég var svo sannarlega ástfangin og tilbúin til að hefja nýtt líf með Kennedy.
Ég vona þín vegna að hann muni ekki gera þér þetta aftur, sem er líklega óhjákvæmilegt miðað við þann mann sem hann hefur að geyma. Þú þarft ekki að hafa áhyggju af mér hvað það varðar, „fool me once“ og allt það.
En sem hjónadjöfull ætla ég ekki að bera hjónadjöfla titilinn hans líka, hann getur gert það sjálfur.
