Hljómahöllin – Rokksafn opnaði formlega um helgina í bítlabænum Reykjanesbæ með glæsilegri tónlistarveislu. Hljómahöllin er viðbygging við gamla góða Stapann í Njarðvíkurhverfi, sem hafðu áður verið endurhannaður og endurbyggður með glæsilegum hætti. Í Hljómahöllinni er Rokksafn þar sem íslenskri tónlistarsögu er gerð góð skil, sama hvort um sé að ræða gamla sem og samtíma sögu okkar íslensku tónlistamanna.
Hljómahöllin er glæsileg bygging sem er bæjarfélaginu til sóma. Innan dyra heldur glæsileikinn áfram. Sagan er endurspegluð með umfjöllun og ljósmyndum, hljóðfærum fatnaði stjarnanna og þar má meðal annars finna hvíta gallann hans Páls Óskars með led lýsingunni sem hann klæddist í Hörpunni með eftirminnilegum hætti. Þá er tónleikasalur og bíósalur, kaffihús og bar. Þá vekur mikla athygli listaverk af hljómsveitinni Hjálmar. En íslensk listakona smíðaði hvern og einn í hljómsveitinni ásamt hljóðfærum úr timbri. Þá er algjör snilld að gestir safnsins fá afhenta spjaldtölvu til að kafa dýpra í söguna sem spannar tónlistarsöguna allt frá 1830. Þá er frægðarveggur með myndum af öllum sem hafa fengið heiðursverðlaun íslensku tónlistarverðlaunanna. Þá er rokk-búð þar sem tónlist og munir eru fáanlegir.
Það er við hæfi að Rokksafn Íslands sé staðsett í Reykjanesbæ. Sagan á sér djúpar rætur í bæjarfélaginu og margir af helstu stórstjörnum íslenskrar tónlistar koma þaðan eða hafa stigið sín fyrstu spor þar, sama hvort það var á balli í Stapanum eða í Stúdíóinu Geimsteini hjá Rúnari Júl heitnum. Reykjanesbær á hrós skilið fyrir safnið og Hljómahöllina sem á eflaust eftir að laða að gesti sem vilja fræðast um okkar frábæra tónlistarfólk og eiga þennan heiður svo sannarlega skilinn.
Árni býr í Reykjavík en ólst upp í Garðinum. Hann lauk stúdentsprófi frá Fjölbrautaskóla Suðurnesja og nam stjórnmálafræði við Háskóla Íslands. Að því gefnu hefur hann mikinn áhuga á stjórnmálum, ásamt því að vera mikill áhugamaður um hönnun, arkitektúr og ljósmyndun. Árni hefur gaman að tónlist og leiklist, kvikmyndum og matargerð annarra. Hann viðurkennir fúslega að vera ömurlegur í eldhúsinu og leggur ekki á nokkurn mann að koma í mat til sín. Nýja dellan er að vaða um íslenska náttúru með myndavélina og reyna að ná góðum myndum með misjöfnum árangri. Árni er mikil félagsvera og nýtur sín best í góðra vina hópi og með fjölskyldunni. Hann er dýravinur, en gengur illa að eiga gæludýr. Þau annað hvort drepast eða flýja af heiman. Árni gleymir sér á netinu við að skoða fallega hönnun, heimili og fasteignasíðurnar eru í miklu uppáhaldi. Árni deilir með okkur því sem hann fellur fyrir hverju sinni og reynir að koma víða við í stílum og hönnun til að ná til sem flestra. Árni heldur úti Facebooksíðu þar sem hann deilir hugðarefnum sínum, enda kallar hann síðuna Hugarheim Árna.
