Hvort sem þú ert sælkeri eða ekki þá er alltaf ljúft að eiga hráköku í frystinum. Auk þess að vera troðfull af góðri fitu og öðrum næringarefnum þá er þessi líka mjög bragðgóð. Tilvalið að grípa í eina pena sneið ef sykurþörfin kallar eða ef þig langar bara í eitthvað smá með kaffibollanum.
Undir- og yfirlag
100 gr valhnetur
150 gr möndlur
1/8 tsk salt
190 gr ferskar döðlur
50 gr kakóduft
Millilag
90 gr möndlur
45 gr. valhnetur
125 gr rúsínur
½ bolli haframjöl
3-4 msk hnetusmjör
Aðferð
1. Setjið valhnetur, möndlur, salt, ferskar döðlur (steinhreinsaðar) og kakóduft í matvinnsluvél og blandið mjög vel saman – þið viljið helst fá ákveðna leiráferð á soppuna
2. Setjið bökunarpappír í botninn á tveimur hringlaga bökunarformum
3. Skiptið soppunni í tvennt og þrýstið vel út til hliðanna
4. Geymið í frysti meðan þið gerið millilagið
5. Setjið möndlur og valhnetur fyrst í matvinnsluvélina og blandið – bætið svo við rúsínum og haframjöli og blandið enn betur
6. Hrærið hnetusmjörinu út í og blandið öllu mjög vel saman. 7. Takið yfir- og undirlagið út úr frystinum og leggið undirlagið á disk
8. Smyrjið millilaginu jafnt á og leggið svo yfirlagið yfir
9. Skreytið að vild og skellið þessu í frysti
10. Takið út og njótið hvenær sem hentar
Höfundur: Birna Varðar.
Birna er tvítug Reykjavíkurmær. Hún er stúdent frá Verzlunarskóla Íslands og hefur mikinn áhuga á mataræði og heilbrigðum lífsstíl. Birna stundar Boot Camp, hlaup og lyftingar af kappi. Hún er dugleg að takast á við krefjandi áskoranir og leika lausum hala utan þægindarammans. Hvort sem það er utanvegahlaup, kraftlyftingar, þrekkeppnir eða annað í þeim dúr. Birna mun deila uppskriftum úr eigin tilraunaeldhúsi með lesendum Hún.is ásamt því að skrifa skemmtilega og upplífgandi pistla er snúa að heilbrigðum lífsstíl og sjálfsrækt.
