Hefur þú sprangað um í glænýjum dökkum gallabuxum? Jafnvel tyllt þér í hvítan leðurstól? Eða hvers kyns innanstokksmuni sem ljósir eru á lit. Staðið svo upp, horft á stólinn og hann er bara ekki lengur hvítur. Alveg þvert á móti. Blá slykja liggur yfir sætinu og sama hversu mikið þú sleikir á þér puttana og reynir að ná ósköpunum af þá gerist ekkert. Þetta er pikkfast.
Ég hef einu sinni staðið upp úr hvítu sófasetti og fengið hland fyrir hjartað. Blessunarlega var sófasettið ekki í minni eigu. Þannig að ég hysjaði bara upp um mig spánýju gallabuxurnar mínar og flúði af vettvangi med det samme.
Þennan glæp má víst mjög einfaldlega koma í veg fyrir.
Þú þarft:
Baðkar/vask/vaskafat
1 bolla af borðediki
Settu kalt vatn í baðkarið, vaskinn eða ílátið sem þú hefur valið þér til brúks. Skvettu edikinu saman við. Hentu gallabuxunum út í á röngunni og láttu þær dúsa þar í góðan klukkutíma. Jafnvel yfir nótt. Leggðu þær síðan til þerris.
Voilá, rassinn á þér skilur aldrei eftir sig ummerki aftur.
Tengdar greinar:
7 húsráð varðandi þvott á fötum – Fötin endast lengur
Guðrún Veiga er fædd og uppalin á Eskifirði. Hún er mannfræðingur að mennt, mikill matgæðingur, mamma og múltítasker. Guðrún Veiga hefur skrifað fyrir hina ýmsu miðla, unnið í sjónvarpi og skrifað eitt stykki matreiðslubók.
