Víðar kærastagallabuxur, mokkasíur, lausir jakkar og allt þar á milli – karllægur fatnaður á konum er stíll sem er ávallt vinsæll. Þökk sé Coco Chanel telst það núna sjálfsagt mál að konur rokki þessa ‘karlmannstísku’! En þótt þú kjósir að fara þessa leið er ýmislegt sem þarf að passa. Hér eru nokkur góð ráð.
1. Veldu þér fylgihlutina vel
Við þurfum ekki að þrengja klæðavalið við eintómar buxur eða upphnepptar skyrtur. Það má leika sér með fylgihluti! Hattar, axlabönd, oxford skór, slaufur og bindi – allt þetta smellpassar við flott pils og rífur upp andstæðurnar sem við erum svo hrifin af.
2. Ekki vera hrædd við lit
Þótt við séum að fá ýmislegt lánað úr karlmannstískunni er óþarfi að halda sig við sömu litapallettu. Skiptu út svarta eða dökkbláa jakkanum fyrir til dæmis, gulan eða ferskulitaðan jakka. Svo má einnig nota þetta sama ráð þegar kemur að skóm.
3. Leiktu þér með efni og mynstur
Mynstur og efni spila jafn stórt hlutverk í fataskáp karla og kvenna og með mismunandi samsetningu má ýkja eða draga úr karllægninni. Prófaðu tweed, rendur eða köflótt. Leiktu þér og blandaðu saman. Smekklega samt… Það vill enginn líta út eins og bútasaumsteppi.
4. Taktu stærri stærðir
Eitt af því sem er svo gott við þennan stíl er að sjaldnast þarf að draga inn magann til að passa í buxurnar! Víðar peysur og lausar gallabuxur gefa þægindin í skyn. Það að vera kvenleg þýðir alls ekki að þú þurfir að vera í níþröngum fatnaði sínkt og heilagt. Prófaðu að para saman hvítan bol í víðari kantinum við gallabuxur og flott hálsmen. Ef þú nærð þessu rétt þá verður útkoman mjög töff.
5. Passaðu að vera ekki í öllu stóru
Jafnvægi er lykilatriði. Ekki vera í víðum bol og víðum jakka og víðum buxum og ÖLLU víðu. Við viljum ekki líta út eins og við séum í fötum af afa okkar fyrir 20 árum.
6. Haltu kúlinu
Leyndarmálið að baki þess að líta ekki út eins og gaur frá toppi til táar er einfalt. Ekki klæðast öllum karllægu fötunum þínum í einu. Farðu í háa hæla ef þú ert í buxnadragt. Vertu í oxford skóm við pils. Smelltu á þig perlufesti til að mýkja heildina.
7. Ekki gleyma förðuninni
Klæddu þig á karllægan máta en líttu út eins og kona. Það er fátt kvenlegra í förðun en smá kinnalitur og litsterkur varalitur!
Hvert er þitt uppáhald úr fataskáp strákanna?
