Jæja, við erum hvað flest ennþá með glassúrslefuna í munnvikinu eftir gærdaginn. Mögulega búin að hneppa frá buxunum fyrir saltkjötsveislu kvöldsins. Og klár í að hnupla sælgæti frá börnunum okkar á morgun.
Er ekki tilvalið að hræra í einn meinhollan brauðhleif svona inn á milli þess sem við sjúgum í okkur salt, sælgæti og rjóma? Jú, ég hefði nú haldið það. Þessi ljúffenga uppskrift kemur af blogginu hennar Tinnu Bjargar – sem ég hvet ykkur auðvitað til þess að fylgjast með. Bananabrauðið sem um ræðir inniheldur hvorki hveiti né sykur en er samt sem áður ofboðslega mjúkt sætt og gott – gefur þeim sykruðu svo sannarlega ekkert eftir.
Hveiti- og sykurlaust bananabrauð
1 dl Sukrin
2 egg
1 tsk salt
1/2 tsk matarsódi
3-4 stappaðir bananar
5 dl malað haframjöl
handfylli heslihnetur
- Hrærið Sukrin og eggjum saman í skál ásamt salti og matarsóda. Blandið stöppuðum bönunum og möluðu haframjöli saman við. Smyrjið brauðform, smyrjið deiginu í og sáldrið heslihnetum jafnt yfir. Bakið við 180° í 45-50 mínútur eða þar til bananabrauðið verður svolítið dökkt.
- Athugið að haframjölið er fínmalað í blandara eða matvinnsluvél áður en það er mælt.
- Þeir sem vilja hafa bananabrauðið mjög sætt setja 4 banana í deigið, mér finnst nægja að hafa þá 3 eða 3 og 1/2. Heslihneturnar ofan á brauðinu þykja mér ómissandi. Þær ristast í ofninum og verða svo dásamlega stökkar og bragðgóðar.
Tengdar greinar:
Sykurlaus eplakaka með pekanhnetukurli – uppskrift
Guðrún Veiga er fædd og uppalin á Eskifirði. Hún er mannfræðingur að mennt, mikill matgæðingur, mamma og múltítasker. Guðrún Veiga hefur skrifað fyrir hina ýmsu miðla, unnið í sjónvarpi og skrifað eitt stykki matreiðslubók.
