Líkamleg óþægindi
Bæði hjá börnum og fullorðnum tengjast líkamleg óþægindi daglegum viðfangsefnum eins og því að koma sér fyrir í armstólum, sinna persónulegu hreinlæti, hnýta skóreimar sínar, klæða sig og hjóla svo dæmi séu tekin. Óþægindin fara eftir því hversu feitt fólk er og einnig aldri viðkomandi.
Sjá einnig: Offita og yfirþyngd á Íslandi
Sjúkdómar sem tengjast offitu
Ýmsir sjúkdómar eru algengari hjá offeitum en öðrum og má þar nefna:
- aldurstengda sykursýki
- blóðtappa í hjarta
- blóðtappa í heila (heilablóðfall)
- gallsteina
- þvagsýrugigt
- slitgigt í höndum, hnjám og mjöðmum
- brjóstakrabbamein
- krabbamein í leghálsi
- ristilkrabba
- krabbamein í nýrum
Þessu til viðbótar má nefna ýmsa kvilla sem fólk tengir yfirleitt ekki sérstaklega við offitu, svo sem ófrjósemi (barnleysi) kvenna, bakverk og astma.
Óþægindi á meðgöngu
Sumar feitar konur finna fyrir meiri óþægindum á meðgöngunni en eðlilegt getur talist. Hafi kona sem telst vera of feit orðið þunguð eykst hættan á fósturláti í lok meðgöngu og sömuleiðis hættan á meðgöngueitrun. Sama máli gegnir um erfiðleika í fæðingu. Hættan á að barnið festist í burðarliðnum og að beita þurfi keisaraskurði er meiri hjá þeim konum sem teljast vera of feitar.
Sjá einnig: Þyngdaraukning, þreyta og fleira getur stafað af vanvirkni í skjaldkirtli
Aldurstengd sykursýki hjá ungu fólki
Alvarlegasti sjúkdómurinn sem fylgt getur offitu er aldurstengd sykursýki. Samhengið á milli líkamsþyngarstuðuls (LÞS) og hættunnar á aldurstengdri sykursýki: Í raun er ekki rétt að tengja þessa tegund sykursýki við hækkandi aldur þar sem hún greinist æ oftar hjá ungu fólki en það tengist aukinni tíðni offitu meðal barna og unglinga. Ef maður gefur sér að tíðni þessarar tegundar sykursýki hjá konum með LÞS undir 22 sé „eðlileg“ sýnir eftirfarandi listi hvað hættan á því að konur fái sjúkdóminn eykst eftir því sem þær eru þyngri:
LÞS á bilinu 25-27: 8 sinnum meiri áhætta
LÞS á bilinu 31-33: (offita) 40 sinnum meiri áhætta
LÞS hærri en 35 (mikil offita): 93 sinnum meiri áhætta
Sama beina samhengið er á milli LÞS og tíðni hjartasjúkdóma og gallsteina. Það hefur aftur áhrif á lífslíkurnar:
Ævilengdin styttist í hvert sinn sem fólk færist upp um þyngdarflokk.
Við þetta bætast, eins og fram hefur komið, ýmis vandamál sem tengjast bakinu og liðum sem þyngdin mæðir mikið á, svo sem mjaðma- og hnjáliðum. Allt veldur þetta auknum fjarvistum frá vinnu og getur leitt til þess að fólk verður öryrkjar.
Þess vegna eru nægar ástæður til að halda LÞS niðri en offitu fylgja alls engir kostir.
Sjá einnig: Hugrakkur ungur maður sýnir afleiðingar yfirþyngdar
Lífslíkurnar aukast ef við grennumst
Því er stundum slegið fram í fjölmiðlum að það geti verið hættulegt að grenna sig. Slíkar viðvaranir byggjast á eldri rannsóknum sem sýndu að þyngdartap tengdist almennt aukinni sjúkdóma- og dánartíðni. Það kom hins vegar ekki fram í rannsóknum þessum hver ástæða þyngdartapsins var né hvort það var afleiðing megrunarkúra sem byggðust á skynsemi. Nýrri rannsóknir hafa þvert á móti leitt í ljós að fólk getur lengt ævina með því að grennast, svo fremi að megrunin bitni ekki á öðrum líkamsmassa en fitunni. Því er hægt að komast hjá með því að forðast hastarlega föstu eða megrunarkúra sem byggjast á að borða eingöngu eitthvert duft. Slíkir megrunarkúrar hafa oft í för með sér að fólk fær ekki nóg af lífsnauðsynlegum næringarefnum, einkum próteini, mikilvægum steinefnum og vítamínum. Skynsamlegur megrunarkúr í tengslum við aukna líkamlega hreyfingu tryggir á hinn bóginn að megrunin eigi sér stað með eðlilegum hætti og leiði til aukinnar vellíðunar, heilbrigði og lengi lífið.
Í Danmörku renna 5-8% af heildarútgjöldum til heilbrigðismála til meðferðar vegna offitu og sjúkdóma sem hún veldur. Í Bandaríkjunum er þetta hlutfall 10%. Ef við reynum ekki að spyrna við fótum og hamla gegn aukinni offitu munu útgjöld til offitusjúkdóma aukast svo mikið að biðlistar eftir aðgerðum lengjast og þegar svo er komið getur reynst nauðsynlegt að skera niður & uacute;tgjöld vegna annarra sjúkdóma.
