Ég er alger sökker fyrir góðum pottréttum og inn á heimasíðu Allskonar.is fann ég þessa girnilegu uppskrift. Ég ætla að skella í þennan pottrétt um helgina og efast ekki um að hann sé geggjað góður miðað við hráefnið!
Þú þarft að nota pönnu eða pott sem þolir að fara inn í heitan ofn með loki, 3-4L pottur dugar vel.
Irish stew fyrir 4
Uppskrift:
- 750gr nautakjöt, í bitum
- 4 msk hveiti
- 1 tsk svartur pipar
- 1 tsk cayenne pipar
- 2 tsk salt
- 2 msk olía
- 4 gulrætur, skornar í stóra bita
- 3 sellerístilkar, skornir í stóra bita
- 5 skallottulaukar, flysjaðir og skornir í tvennt
- 3 hvítlauksrif, marin
- 3 msk tómatpúrra
- 6 msk balsam edik
- 2 msk Worchestershire sósa
- 2 lárviðarlauf
- 8 dl vatn
- 2 teningar nautakjötkraftur
- 1 tsk timian, þurrkað (eða 1 grein, ferskt)
- 8 litlar kartöflur, flysjaðar
Undirbúningur: 20 mínútur
Eldunartími: 3 1/2 klukkustund
Aðferð:
Byrjaðu á að hita ofninn í 170°C.
Blandaðu saman í djúpan disk hveitinu, salti, pipar og cayenne piparnum. Veltu kjötbitunum upp úr hveitiblöndunni.
Hitaðu olíu á meðal hita í pönnu og brúnaðu kjötið, í 4-5 mínútur. Þú gætir þurft að gera þetta í nokkrum skömmtum ef potturinn er ekki mjög stór.
Settu kjötið til hliðar og bættu örlítilli olíu við í pönnuna, settu gulræturnar, sellerí, lauk og hvítlauk út í og brúnaðu, þetta tekur um 10 mínútur.
Ýttu grænmetinu örlítið til hliðar í pottinum og settu nú tómatpúrruna út í, steiktu hana í hálfa mínútu eða svo og hrærðu svo öllu vel saman þannig að púrran blandist vel um allt grænmetið.
Bættu balsam ediki við og láttu malla í 2-3 mínútur. Settu nú Worchestershire sósuna, lárviðarlaufin, timian, vatn og kjötkraft í pottinn og láttu suðuna koma upp. Settu lok á pönnuna, slökktu undir og færðu inn í ofninn miðjan. Láttu eldast í ofninum í 2 1/2 – 3 klst.
Settu kartöflurnar út í þegar eru 40 mínútur eftir af eldunartímanum – þú getur líka soðið þær sér ef það hentar betur, og bætt út í þegar þú tekur pottréttinn út úr ofninum.
Berðu fram í djúpum diskum – og ekki er verra ef til er nýbakað brauð til að þurrka upp sósuna.
Gott rauðvín toppar þetta.
Verði ykkur að góðu!
Kristín fæddist á nunnuspítala og var skírð á flugvelli í henni Ameríku.
Hún er gift og á þrjú börn og eitt barnabarn. Hún hefur að mestum hlut unnið við að efla fólk og hefur menntað sig á því sviði. Ásamt því að skrifa á hun.is vinnur hún sjálfstætt sem meðferðaraðili.
Elskar að lesa, skrifa og mála en útivist og andleg málefni heilla hana.
Hún skrifar út frá eigin reynslu, faglegu nótunum og kaldhæðnislega um upplifun sína af breytingarskeiði miðaldra kvenna. Með hækkandi aldri hefur hún lært að létta sér lífið sem húsmóðir og gera mat á einfaldan hátt en alveg afbragðsgóðan svo frá henni má sjá uppskriftir að ýmsu góðgæti.
Hennar mottó er jákvæðni út í kosmósið því hún hefur lært af lífinu að jákvæðni kemur manni ansi langt!
