Andri Freyr Viðarsson hefur heldur betur heillað landsmenn með þáttum sínum „Andri á flandri“ þar sem hann hefur skoðað litríkt mannlíf landsins. Einnig hefur útvarpsþátturinn „Virkir morgnar“ sem hann er með á Rás 2 slegið í gegn en Andri er þar í aðalhlutverki ásamt Gunnu Dís.
Andri Freyr er í Yfirheyrslunni í dag
Fullt nafn: Andri Freyr Viðarsson
Aldur: 32 ára
Hjúskaparstaða: Einhleypur og barnlaus.
Atvinna: Dagskrárgerðamaður
Hver var fyrsta atvinna þín?
Ég klóraði frænda mínum á bakinu á sumrin á meðan hann var í körfu að týna gúrkur, tómata eða paprikur. Fyrir dagvinnuna fékk ég Toffee Popps pakka, illa sáttur skóf ég súkkulaðið og karamelluna af með framtönnunum og henti restinni. Lúxus líf.
Mannstu eftir einhverju ákveðnu tískuslysi frá unglingsárum þínum?
Þau voru nokkur. Það versta var sennilega Shell derhúfa sem ég tók derið af og setti Sid Vicious bót yfir Shell og skreytti svo restina með litlum hljómsveitarbarmmerkjum.
Áttu leyndarmál sem mun fylgja þér til grafar?
Já, það er þá sennilega eitthvað sem aðrir hafa sagt mér, ég er allt of duglegur við að segja fólki allt um sjálfan mig.
Hefurðu farið hundóánægð/ur úr klippingu og sagt ekki neitt við klipparann?
Já. Þetta gerist eiginlega alltaf þegar ég fer í klippingu. Mér er illa við nýjar klippingar.
Kíkirðu í baðskápana hjá fólki sem þú ert í heimsókn hjá?
Nei. Er svo hræddur um að vera vandræðalegur þegar ég kem út.
Vandræðalegasta atvik sem þú hefur lent í?
Úff, þau eru allt of mörg og eru eiginlega ekki prenthæf.
Vefsíðan sem þú skoðar oftast?
http://halifaxcollect.blogspot.com/?m=1
Seinasta sms sem þú fékkst?
Nýjasti Mental Illness Happy Hour er meiriháttar. Checkit. ….Frá bróðir mínum.
Hundur eða köttur?
Hundur.
Ertu ástfangin/n?
Nei
Hefurðu brotið lög?
Já, ég kýs að tjá mig ekki um það mál.
Hefurðu grátið í brúðkaupi?
Nei.
Hefurðu stolið einhverju?
Eeeeeee já. Hafa ekki allir gert það. Ég held að þeir sem segjast ekki hafa gert það séu lygarar. Ég hætti því eftir að ég var „böstaður“ við að stela Pantera videospólu í Skífunni 1996.
Ef þú gætir breytt einu úr fortíðinni hvað væri það?
Veistu ég veit það ekki. Það sem maður er ósáttastur við að hafa gert mótar mann mest, eða það held ég.
Hvernig sérðu þig fyrir þér þegar þú ert komin á eftirlaun?
Ógeðslega leiðinlegan gamlan kall sem er alltaf að rífa kjaft.
Kidda Svarfdal er ritstjóri og eigandi Hún.is en hún er frá Djúpavík á Ströndum. Hún fór á bát og snjósleða í skólann þegar hún var lítil og var í heimavist í Finnbogastaðaskóla. Hún hefur haft gaman að krossgátum og íslensku frá unga aldri og hefur skrifað ljóð, sögur, pistla og fleira. Ásamt því að skrifa á Hún.is er Kidda, ásamt fjölskyldu sinni, mikið í Djúpavík þar sem fjölskyldan er með ferðaþjónustu.
