Þessi dásemdar réttur kemur frá henni Röggu mágkonu og er ekkert smá góður.
Uppskrift:
4-6 kjúklingabringur
1 krukka rautt pestó
2 piparostar
1/2 líter matreiðslurjómi.
Aðferð:
Piparostur rifinn niður eða saxaður smátt.
Skorinn vasi í kjúklingabringurnar og ca 1 teskeið af rauðu pestói sett í hann og smá af rifna piparostinum. Fylltu bringurnar settar í eldfast mót.
Smá pestó sett yfir hverja bringu og restin af rifna ostinum dreift yfir, loks er rjómanum hellt yfir allt og þetta bakað í ofni við 180 gráður í um 40 mínútur.
Borið fram með góðu salati og hvítlauksbrauði.
Njótið í botn.
Kristín fæddist á nunnuspítala og var skírð á flugvelli í henni Ameríku.
Hún er gift og á þrjú börn og eitt barnabarn. Hún hefur að mestum hlut unnið við að efla fólk og hefur menntað sig á því sviði. Ásamt því að skrifa á hun.is vinnur hún sjálfstætt sem meðferðaraðili.
Elskar að lesa, skrifa og mála en útivist og andleg málefni heilla hana.
Hún skrifar út frá eigin reynslu, faglegu nótunum og kaldhæðnislega um upplifun sína af breytingarskeiði miðaldra kvenna. Með hækkandi aldri hefur hún lært að létta sér lífið sem húsmóðir og gera mat á einfaldan hátt en alveg afbragðsgóðan svo frá henni má sjá uppskriftir að ýmsu góðgæti.
Hennar mottó er jákvæðni út í kosmósið því hún hefur lært af lífinu að jákvæðni kemur manni ansi langt!
