21 árs gömul líbönsk ört rísandi klámstjarna á fótum sínum fjör að launa þessa dagana og hefur vart undan að svara morðhótunum sem flæða frá heittrúuðum múslimum frá Mið-Austurlöndum gegnum Twitter.
Stúlkan sem ber nafnið Mia Khalifa og fluttist ásamt strangtrúuðum foreldrum sínum til Bandaríkjanna aðeins tíu ára að aldri er ein alvinsælasta klámstjarnan á klámsíðunni Pornhub og virðist ekkert lát á eftirspurn eftir atriðum þar sem Mia kemur við sögu.
Mia, sem er menntaður sagnfræðingur, á stuttan feril að baki í klámmyndum en hún hefur rakað inn seðlum frá því hún hóf vafasaman leikferilinn og hefur þannig fest kaup á sinni fyrstu íbúð.
Rakalausar vinsældir hennar hafa vakið upp ómælda reiði íhaldsamra og heittrúaðra múslima og þannig ætlaði allt um koll að keyra eftir að stúlkan var mynduð við kynlífsathafnir íklædd engu öðru en hijab; slæðu múslimakvenna sem hún bar á höfðinu meðan hún sást gæla við nakinn karlmann.
.
Mia segir fásinnu að hún hafi vanhelgað Islam með því að bera hijab; um íróníu sé að ræða
.
Þá hafa heittrúaðir sem róttækir líbanskir múslimar sagt Miu vera landi sínu og þjóð til skammar, kallað stúlkuna fyrirlitlega og jafnvel hótað að afhöfða hana líkt og ISIS hefur gert við fórnarlömb sín. Mia hefur deilt háðmyndum sem eiga að vera af henni í höndum böðla að bíða lífláts; látið áfram ganga þær hugmyndir að hún eigi að stikna í helvíti og að hún eigi hreinsunareldinn skilið.
.
.
Mia hefur svarað gagnrýnisröddum af yfirvegun og af ákveðni, en hún hefur gjarna deilt tístum sem innihalda líflátshótanir í hennar garð á eigin Twitter síðu og sagði þannig í viðtali við Washington Post að slíkar senur væru „satíra” sem ætti að taka sem grátbroslegu háði.
Ég fæ ekki betur séð en að Hollywood varpi oft mun háðslegri bjarma á múslima og sýni múslima í mun viðurstyggilegra ljósi en nokkur sú sena sem ég hef tekið þátt í á vegum framleiðslufyrirtækisins sem ég starfa fyrir.
Í viðali við Newsweek sagði Mia þá að helsta gagnrýnin beindist að skömm þeirri sem hún hefði kallað yfir Líbanon með því að taka þátt í gerð klámmynda, en hún er með upphafsstef líbanska þjóðsöngsins húðflúraðan á annan handlegginn:
Þeim finnst niðurlægjandi að ég sé að gera tilkall til líbönsku þjóðarinnar. Eins og ég ráði einhverju um hverrar þjóðar ég er. Ég fæddist þarna. Í þessu landi.
Þó er gjald frægðarinnar dýru verði keypt fyrir Miu, sem segir foreldra hennar hafa slitið öllum samskiptum við hana og afneitað henni með öllu opinberlega í gegnum líbanska fjölmiðla.
Það er mannorð foreldra minna sem ég hef dregið ofan í svaðið. Ekki þjóðarinnar. Og það þykir mér leitt. Ég finn fyrir mun meiri sekt í garð foreldra minna en í garð Lîbanon. Allir vinir þeirra vita hvað ég geri, því umfjallanir um störf mín í Bandaríkjunum hafa tröllriðið líbönskum fjölmiðlum að undanförnu. Ég ætlaði mér aldrei að valda svona miklum usla, en þetta vatt bara upp á sig.
Engu að síður hafa líbanskir mannréttindafrömuðir komið Miu til varnar og lýst yfir stuðningi við það val hennar að kjósa fyrst allra líbanskra kvenna að halsa sér völl í klámmyndabransanum. Þannig hefur líbanski mannréttindafrömuðurinn og rithöfundurinn Nasri Atallah komið henni til varnar og segir meðal annars á Facebook síðu sinni:
Fyrst og fremst hefur hún óskiptan rétt til að ráða yfir eigin líkama, sem kona. Í öðru lagi, sem lögráða einstaklingur með sjáfstæða hugsun, búandi hinu megin á hnettinum – hefur hún fullt vald yfir eigin lífi og skuldar heimalandi sínu; þar sem hún fæddist – ekki nokkurn skapaðan hlut. Það er útbreiddur misskilningur að það eitt að vera af líbönskum ættum sé ábyrgð sem er þrungin skyldum og að persónulegt líf einstaklingsins eigi alltaf að vera í öðru sæti.
Sjálf segir Mia uppþotin endurspegla stærri heildarmynd sem snúi að kúgun og réttindaleysi kvenna í Líbanon og segir þannig í viðtali við Washington Post:
Réttindi kvenna í Líbanon eru fótum troðin og ef libönsk-bandarísk klámleikkona sem er búsett í öðrum heimshluta getur sett allt á annan endann, hljóta réttindi líbanskra kvenna að vera æði takmörkuð. Sú var tíðin að ég hreykti mér af frjálslyndi líbönsku þjóðarinnar en í dag horfi ég til heimalands míns og sé ekkert nema kúgun og bælingu.
Independent greinir frá
Tengdar greinar:
Hijab: „Af hverju bera múslimakonur slæður?“
Guði sé lof að nær enginn skilur íslensku!
Múslimakonur gera tónlistarmyndband við lag Jay-Z
Klara Egilson er íslenskur blaðamaður búsettur í Osló. Hún hefur gengt ritstörfum frá unga aldri og gaf út sína fyrstu smásögu sex ára að aldri: “Kartaflan sem fann alltaf vitlausa lykt” en hefur skrifað allar götur síðan og er ekki ókunn íslenskum fjölmiðlum. Hún er elsk á orð, fagra muni og umfram allt; fjölbreytileika mannlífsins. Klara gegnir í dag stöðu aðstoðarritstjóra HÚN.IS og tekur á ýmsu í umfjöllunum sínum.
