Þessi uppskrift er svo góð og kemur frá Allskonar.is.
Það er svo spennandi að leika sér með samspil krydds og ávaxta í kjötréttum. Þessi kjúklingaréttur er sætur en samt kryddaður og alveg frábær á mánudagskvöldi í byrjun nýrrar vinnuviku.
Ég notaði kjúklingaleggi í þennan rétt og hamfletti þá. Þú getur notað hvaða kjúklingabita sem þú vilt, til dæmis læri með beini eða bringur. Þá áætlarðu um 1 bringu á mann eða 1-2 læri.
Þú þarft stóra djúpa pönnu eða stóran pott til að elda þennan rétt.
Mánudagskjúlli fyrir 4
- 3 msk olía
- 8-10 kjúklingaleggir
- salt
- nýmalaður svartur pipar
- 1/4 tsk kanill
- 1/2 tsk cumin, malað
- 1/4 tsk turmerik
- 3 hvítlauksrif, fínsöxuð
- 1 laukur, í sneiðum
- 5 tómatar, grófsaxaðir
- 1/2 græn paprika, grófsöxuð
- 2 msk tómatpúrra
- 1 appelsína, safi og börkur
- 3 dl vatn
- 1/2 teningur kjúklingakraftur
- 8 þurrkaðar döðlur, grófsaxaðar
- 6 þurrkaðar apríkósur, grófsaxaðar
- 3 gráfíkjur, grófsaxaðar
- 1 lárviðarlauf
- fersk steinselja eða kóríander
Undirbúningur: 20 mínútur
Eldunartími: 60 mínútur
Byrjaðu á að saxa hvítlauksrifin. Það er stórmunur á bragðinu af hvítlauk eftir því hvort hann er marinn, saxaður eða sneiddur. Hér gefur hann léttan tón með því að vera saxaður. Settu í skál.
Skerðu laukinn í sneiðar; skerðu hann í tvennt og skerðu þunnar sneiðar. Settu í skálina með hvítlauknum.
Skerðu tómatana í bita, settu í stóra skál. Saxaðu paprikuna og þurrkuðu ávextina og settu með tómötunum í skál.
Rífðu börkinn af appelsínunni með fínu rifjárni og settu á disk eða í skál.
Hitaðu olíuna í pönnu við meðalhita. Kryddaðu kjúklinginn með salti, pipar, kanil, cumin og turmerik. Steiktu kjúklinginn í 5 mínútur á hvorri hlið. Taktu úr pönnunni og leggðu á disk til hliðar.
Sjá einnig: Chettinad kjúklingur
Bættu meiri olíu í pönnuna og steiktu nú laukinn og hvítlaukinn í 2-3 mínútur eða þar til laukurinn verður glær. Bættu þá tómötunum, paprikunni, tómatpúrrunni, safanum úr appelsínunni, vatninu, kjúklingakraftinum, þurrkuðu ávöxtunum og lárviðarlaufi út í pönnuna. Láttu suðuna koma upp og láttu malla í 2-3 mínútur.
Settu nú kjúklinginn út í sósuna, láttu sósuna þekja hann vel. Settu lok á pönnuna og láttu malla rólega í 40 mínútur, eða þar til kjúklingurinn er lungamjúkur og eldaður í gegn.
Taktu af hitanum og láttu standa í 10 mínútur áður en þú berð fram.
Frábært með smá kúskúsi eða hrísgrjónum, og handfylli af ferskri steinselju eða kóríander yfir.
