Við þurfum að borða fisk og held að flest okkar geri allt of lítið af því. Þessi réttur kemur frá Allskonar.is og er alveg svakalega einfaldur og ljúffengur. Í þennan rétt geturðu notað þorsk eða ýsu, löngu eða hlýra eða jafnvel steinbít. Þetta er ótrúlega fljótleg og einföld uppskrift og mestu skiptir að hráefnið sé gott.
Sítrónufiskur fyrir 4
- 700gr fiskflök
- 3 msk smjör
- safi úr 1/2 sítrónu
- 4 msk hveiti
- 1/2 tsk salt
- 1/4 tsk hvítur pipar, malaður
- hnífsoddur ungversk paprika
Undirbúningur: 10 mínútur
Eldunartími: 20-25 mínútur
Hitaðu ofninn í 170°C.
Skerðu fiskflökin í fallega bita, ágætt er að miða við skammtastærð í bitastærðinni.
Settu smjörið í pott og bræddu, settu sítrónusafann út í og taktu pottinn af hitanum.
Blandaðu hveiti, salti og hvítum pipar saman og settu á disk.
Dýfðu fiskinum í smjörið og þar næst í hveitiblönduna. Veltu honum vel upp úr hveitiblöndunni.
Settu fiskbitana í eldfast mót, ekki smyrja mótið.
Helltu afgangnum af smjörinu yfir fiskinn og dreifðu smávegis ungverskri papriku yfir, ekki of miklu samt.
Bakaðu inn í ofni við 170°C í 20-25 mínútur eða þar til fiskurinn er tilbúinn, tíminn fer eftir stærð, tegund og þykkt fisksins.
Sjá einnig: Djúpsteiktur fiskur
Kidda Svarfdal er ritstjóri og eigandi Hún.is en hún er frá Djúpavík á Ströndum. Hún fór á bát og snjósleða í skólann þegar hún var lítil og var í heimavist í Finnbogastaðaskóla. Hún hefur haft gaman að krossgátum og íslensku frá unga aldri og hefur skrifað ljóð, sögur, pistla og fleira. Ásamt því að skrifa á Hún.is er Kidda, ásamt fjölskyldu sinni, mikið í Djúpavík þar sem fjölskyldan er með ferðaþjónustu.
