Ég sagði ykkur á dögunum frá persónulegri reynslu minni af því þegar einhver nákominn tekur sitt eigið líf. Sjálfsvíg eru oft talin vera mikið feimnismál og eitthvað sem má ekki ræða. Ég átti til að mynda mjög erfitt með að útskýra fyrir börnum mínum, hvað hefði dregið vinkonu mína til dauða, en hún hafði tekið sitt eigið líf. Ég fann að mig langaði ekki að segja þeim frá þessari staðreynd lífsins. Að þetta væri eitthvað sem gerðist og þetta væri, í alvöru, eitthvað sem fólk tæki ákvörðun um, að yfirgefa þessa jarðvist með þessum hætti.
Ég er búin að fá ofsalega jákvæð viðbrögð við skrifum mínum og er óendanlega þakklát fyrir það. Mig langar endilega að segja ykkur frá átaki sem er samvinnuverkefni Geðhjálpar, Hjálparsíma Rauða krossins og tólf manna hlaupahóps, en átakið er undir yfirskriftinni Útmeð’a.
Með yfirskriftinni eru ungir karlmenn hvattir til að setja erfiðar tilfinningar í orð til að bæta líðan sína. Hlaupahópurinn hljóp hringveginn með viðkomu í Vestmannaeyjum til að safna fyrir kostnaði við gerð myndbandsins fyrr í sumar.
Markmiðið með gerð og dreifingu myndbandsins er að stuðla að fækkun sjálfsvíga á Íslandi – einkum meðal karla í aldurshópnum 18 til 25 ára. Sjálfsvíg eru algengasta dánarorsök karlmanna í þessum aldurshópi á Íslandi. Í myndbandinu er tæpt á nokkrum helstu orsökum sjálfsvíga ungra karla og veittar upplýsingar um hvert fólk í sjálfsvígshugleiðingum getur leitað sér hjálpar.
Við getum talið okkur vita hvað fólk er að upplifa og hversu illa þeim líður en við getum ekki verið viss. Spyrjum og veitum fólkinu okkar og þeim sem leita til okkar hlýju og ráð. Það er hægt að leita til fagaðila og frí viðtöl eru veitt hjá Geðhjálp.
[facebook_embedded_post href=”https://www.facebook.com/hunsidan/posts/1116497755045699″]
Til þín sem ert í þessum hugleiðingum: Þó þú sért að upplifa að lífið sé glatað og það skipti engu hvort þú leitir þér hjálpar eða ekki, prófaðu það samt. Vittu til að það mun virka og þú munt hugsa til baka með þakklæti fyrir að hafa ekki gefist upp.
Við hvetjum alla til að kynna sér þetta verkefni á Utmeda.is
Kidda Svarfdal er ritstjóri og eigandi Hún.is en hún er frá Djúpavík á Ströndum. Hún fór á bát og snjósleða í skólann þegar hún var lítil og var í heimavist í Finnbogastaðaskóla. Hún hefur haft gaman að krossgátum og íslensku frá unga aldri og hefur skrifað ljóð, sögur, pistla og fleira. Ásamt því að skrifa á Hún.is er Kidda, ásamt fjölskyldu sinni, mikið í Djúpavík þar sem fjölskyldan er með ferðaþjónustu.
